Amed
Şêx Seîd û hevalên wî di 99'emîn salvegera îdama wan de li cihên hatin îdamkirin hatin bibîranîn. Beşdaran xwest cihê gora wan bê eşkere kirin.

Şêx Seîd û 46 hevalên xwe roja 29'ê pûşpera 1925'an hatin îdamkirin. Li Komeleya Piştgirî, Çand û Perwerdehiyê ya Şêx Seîd ji bo bîranîna wan daxuyanî hat dayîn. Rêveberên komeleyê, endamên DEM Partî, DBP'ê, Baroya Amedê, endamên MED TUHAD-FED'ê jî amade bûn.
Neviyê Şêx Seîd Mehmet Kasim Firat axivî û diyar kir ku yek ji rojên tarî ya Kurdistanê jî roja 29'ê pûşperê ye. Firat got ku ji ber sala 1924'an gotin li vir kurd tune ne, Kurdistan tune ye û li vî welatî her kes tirk e, zimanê wan tirkî ye, Şêx Seîd û hevalên wî dijî vê derketin û ji Pîranê berxwedan dan dest pê kirin.
Cîgirê Serokê Baroya Amedê Mehdi Ozdemir jî di axaftina xwe de got ku di van 99 salan de hem malbata wan, hem saziyan û parêzeran serî li dewletê daye ku arşîv bêne vekirin lê heta niha dewletê bi tu awayî arşîv venekirine, der barê gorên wan de jî tu agahî nedaye.
Dûre daxuyaniya giştî bi kurmancî û kirmanckî ji aliyê rêveberê komeleyê Mordem Zel ve hate xwendin.
Piştî axaftin û daxuyaniyan beşdar heta cihê Şêx Seîd û hevalên wî hatin îdamkirin meşiyan, li wir ew bibîr anîn.