Diyarname

Edîtorê beşa erebî yê ajansa Rojnewsê Silêman Ehmed ev 211 roj bûn xeber jê nedihat girtin, êvara 22’yê mehê parêzeran yekem car ew dît.

Ev 211 roj bûn rojnameger, sendîka û rêxistinên sivîl di qada neteweyî û navneteweyî de banga dîtin an berdana Silêman Ehmed dikirin. Di dawiyê de yek ji parêzerên Ehmed ji bo Rojnewsê got tu destûr hatiye dayîn li Asayîşa Duhokê bi Silêman Ehmed re hevdîtinê bike û ji bo du deqeyan jî bi rêya telefonê bi malbata xwe re baxive.

‘SILÊMAN SIPASIYA HER KESÎ KIR’

Parêzer Beşdar Hesen got, îro li gel parêzer Rêvîng Yasîn, Kameran Sarmemî û Rêbaz Wisû ji bo parastina dosyaya rojnameger Silêman Mihemed Ehmed serdana Dadgeha Lêkolînê ya Duhokê û Rêveberiya Asayîşa Duhokê kirine û got; “Em gelek şanaz in ku me karî îro rojnameger Silêman Ehmed ji nêz ve bibînîn. Em bi Silêman Ehmed re li odeyekê rûniştin. Di hevdîtinê de Silêman Ehmed spasiya hemû kesên ku ji bo wî hewl dane kir û silavek taybet ji hemû xebatkarên Ajansa Rojnewsê re şand. Her wiha Silêman Ehmed spasiya hemû rêxistin, sendîka, rojnamevan û welatparêzan kir ku hewl dane wî azad bikin. Em gelek kêfxweş in ku me rewşa tenduristiya wî baş dît, tenê daxwaza wî ew bû ku heta serbest bê berdan zextên heyî berdewam bike.”

‘TU TOMET LI SER WÎ TUNE YE’

Parêzerê Silêman Ehmed tekez kir ku niha li gor madeya 1 ya yasaya jimare 21 ya sala 2003 ya Parlamentoya Kurdistanê, ku girêdayî ‘têkdana ewlekariya netewî’ ye, zêdetir ji 7 mehan e ji aliyê dadwer ve tê ragirtin û got; “Lê belê heta niha tu tomet li ser wî nehatine tesbîtkirin. Me parêznameya wî wergirt û piştre serdana dadwerê Dadgeha Lêkolînê ya Asayîşa Duhokê kir û got deriyê me ji we re wekî parêzer vekirî ye.”

‘BI AWAYEKÎ FERMÎ ÇÛBÛ ROJAVA’

Parêzer Beşdar Hesen di dawiyê de wiha got; “Emê di demên pêş de ji bo ku doza wî bibin dadgehê xebatên xwe zêdetir bikin û ji xelkê re ragihînin ku çi rojek Silêman Ehmed bê dadgehkirin wê bê berdan. Em geşbînîn ku bi kêfxweşî mizgîniya berdana wî didin. Bi gotina wî, heta niha bi tiştên tê tometbarkirin nehatiye ispatkirin û di dema lêpirsînê de derketiye holê ku bi awayekî fermî çûye rojavayê Kurdistanê û vegeriyaye û xwediyê destûra rûniştinê ye.”

Rojnameger û edîtorê beşa erebî yê Rojnewsê Silêman Ehmed roja 1’ê kewçêra/cotmeha 2023’yan ji bo serdanê çûbû cem malbata xwe ya li Taxa Şêx Meqsûd a Helebê. Silêman roja 25’ê kewçêra/cotmeha 2023’yan dema xwest di Deriyê Pêş Xabûr (Sêmalka) re derbasî Başûr bibe, ji aliyê asayişa Duhokê ve hat revandin û 211 rojbûn agahî jê nedihat girtin.