Diyarname
Weşanxaneya Lîsê berhemeke din a ji rêza wêjeya cîhanê ragihand xwendevanan. Pirtûka William Faulkner ya bi navê “Li ber sikratê” bi wergera Ciwanmerd Kulek hat çapkirin.
Ev romana neqane ya nivîskarê şareza û naskirî William Faulkner cara pêşî di 1930’yî de çap bûye. Roman behsa erdnîgariya sereke ya William Faulknerî, ji başûrê Amerîkayê, jiyana gundewar û bi qalmeqalma mirovên wê yên ji rêzê dike û reng vedide. Li dora babeta dayikeke li ber mirinê û piştî mirina dayikê, li ser wesyeta wê ku termê wê dibin li navçeya wê ya eslî ku veşêrin û di rê de bi barana ku tê û ava çêm radike re pira li ser çêm dirûxe, şepirzetiya di rêwîtiya xwe de dikişînin, nakokî, dilzîzî, sosret, evîna nihênî û encama nedilkirî, kawikî, neçarî, xembarî û derdên têvel ên malbata Bundrenan di romanê de bi sadetî û reseniya zimanekî heremî, monologên hundirîn ên ji devê kesê yekem, hatine vegotin.
Di romana ku ji serî heya dawî ji pêncî û neh beşan pêk tê û panzdeh kesayet carê dorê digirin û vedibêjin, şêwe û dîdeyeke tiraneyî digel karesatên mirovî tên. Rêbaza vegotinê ya Faulknerî di vê romana wî de jî bi cihêtiya perspektîfê têkeliya bergehê raber dike û bi herka hişmendiyê binhişa kesayetan kişif dike.
William Faulknerê ku di 1897’an de hatiye dinê û 1962’yan wefat kiriye. Faulkner ku digel Xelata Nobelê du xelatên Politzerî jî ji bo romanên xwe girtine, ji bilî “Li Ber Sikratê”, bi van romanên xwe jî tê nasîn: “Sound and Fury” (1929), “Sanctuary” (193 ), “Light in August” (1932 ), “Absalom, Absalom!” ( 1936 ), “Intruder in The Dust” (1948), “The Hamlet” ( 1940 ), “The Town” (1947), “The Mansion” (1957), “The Reivers” (1962).
Li Ber Sikratê / William Faulkner / Wergera ji îngilîzî: Ciwanmerd Kulek / Roman / 236 rûpel