Diyarname

HSD'ê (Hêzên Sûriyeya Demokratîk) vê êvarê li Dêrezorê ji bo 48 saetan biryara derketina kuçeyan da. Çima? Li Dêrezorê çi diqewime? Me ew dan hev...

- 27'ê mehê HSD'ê bi navê "Operasyona Xurtkirina Ewlehiyê" li hemberî DAIŞ'ê operasyon da dest pê kirin.

- 30'ê mehê: Navenda Ragihandinê ya HSD'ê ragihand ku ev 3 roj in operasyon didome û heta niha di dema operasyonê de 5 şervanên wan canê xwe ji dest dane.

FERMANDARÊ MECLISÊ JI KAR GIRTIN

- 30 gelawêj: Meclisa Leşkerî ya Dêrazorê ya girêdayî HSD`ê ragihand ku ji ber pêkanîna sûcan li dijî şêniyên herêmê û bazirganiya hişbirê, wan Ehmed El Xebîl (Ebû Xewle) ji erka wî ya fermandariya meclisê dûr xistiye. Ehmed El Xebîl Fermandarê Meclisê bû, bi vê biryarê ji kar hat girtin û hat binçavkirin.

'21 KES HATIN GIRTIN'

- Di daxuyaniya ku HSD'ê roja 4'an belav kir de got ku heta wê rojê 11 çeteyên DAIŞ`ê û 10 bazirganên hişbirê hatine girtin, 3 êrîşkar hatine kuştin. 

'REJIMA SÛRIYÊ JI BO TEVLIHEVÎ ÇEK BIRIN HERÊMÊ'

- 31'ê gelawêjê: HSD'ê ragihand ku hêzên wan ji bo girtina komên çekdar ên ji rojavayê beravê çemê Firatê derbasî rojhilatê Dêrazorê bûne, hin tedbîrên din girtine. Daxuyanî wisa dom kir, "Wan koman dest bi amadekariyan kiriye da ku li rojhilatê Dêrazorê êrîş hêzên me bikin. Hin hêzên ewlehiyê yên rejîma Sûriyeyê duh êvarê bi hewldana derxistina tevliheviya navxweyî çek derbasî herêmê kir. Li rex wê jî, gef û fişar li rûspiyên herêmê jî dikin."

HSD'ê got ku operasyona `Xurtkirina Ewlehiyê` li Dêrazorê berdewam e û ev yek lê zêde kir, "Ji xwe li ser daxwaze gel û rûspiyên herêmê ev operasyon dest pê kir. Hêzên me beriya destpêkirina operasyonê, rûspiyên herêmê bi armancên operasyonê, agahdar kirin."

'ŞAM DIXWAZI ÎSTÎQRARA HERÊMÊ TÊK BIBE'

- 1 Rezber: Encumena Sivîl a Dêra Zorê bi daxuyaniyeke ragihand ku hikumeta Şamê ji berê de û heta niha hewl dide bi rêya derbaskirina komên girêdayî xwe ewlehî û îstîkrara herêmê têk bibe.

ÎLHAM EHMED DAXUYANÎ DA

Seroka Lijneya Rêveberiya Meclisa Sûriyay Demokratîk Îlham Ehmed bi ser hesabê xwe yê twitterê re peyam belav kirin û got ku Îran û Sûriye dehf didin eşîrên ereb ên li herêmê ku bi rêya wan herêmê tevlihev bikin. Îran û Sûriye dixwazin bi vê yekê di navbera kurd û ereban de pevçûnan bidin dest pê kirin. Hedefa wan ew e hêzên Amerîkayê ji herêmê derxin.

JI BO 48 SAETAN BIRYARA QEDEXEYA DERKETINA DERVE

- 1 Rezber: Navenda Ragihandinê ya HSD'ê bi daxuyaniyekê ragihand ku li Dêrazorê qedexeya derketina derve hatiye ragihandin. Qedexeya derketinê ji 2'yê mehê serê sibê dest pêdike û dê 48 saetan bidome.