Diyarname
Hejmara nû ya kovara Nûbiharê derket. Nûbiharê di hejmara xwe ya 119'an de gelek mijar girtine dest.

Nûbihar sê mehan carekê derdikeve pêşberî xwendevanên xwe. Kovara Nûbiharê ku meha borî hejmareke taybet bi kirmanckî (zazakî)* derxistibû niha li gor peryoda xwe hejmara xwe ya nû derxist. Di vê edîtorê kovarê Suleyman Çevik bi sernavê Rewşa Kurdan û Konferasa Neteweyî nivîsa xwe nivîsiye û hêviya xwe ya 'Kurd bi awayekî serketî bikaribin wê konferansê li dar bixin' aniye ziman.

Anjelika Pebodonostseva-Kaya jî bi navê "Di dema Stalîn de polîtîkaya tehcîrê û rewşa kurdan" nivîseke nivîsiye û bal kişandiye ser polîtîkaya Rusyayê ya sedsala 20'an. Di nivîsê de pêşî balê dikişîne ser rewşa kurdan di sîstema Sovyetê de ku wekî otonam dijiyan, qala aliyên erênî dike, dûre jî aliyên neyînî yên sirgûnkirina kurdan dike. Nivîs bi vê analîzê bi dawî dibe: "Salên sirgûn di hişê kurdan de, tahrîbateke mezin pêk anî. Piraniya kurdan koçê qebûl nekirin, yên ku taswîb kirin jî ji azadiya kesayetiya xwe ditirsiyan, ji ber vê yekê qebûl kirin. Di dema koçan de, birêziknameya taybet, nedihiştin ku mamoste an kesên ku perwerdehiyê bidin bikevin nav van koçberan. Lê tevî van mercan, li Asya Navîn hinek entelektuelên kurd jî gihîştin, wek Nadir Nadirov."

Abdulkadir Gok jî bi sernavê "Di bin 'Siya Mem ûn Zîn'ê de xirabkirina çanda kurdan" li ser rêzefîlmê TRT'ê ku bi navê "Mem û Zîn" dikişîne nivîs nivîsiye û rexne li rêzefîlm girtiye. Gok wisa dibêje: "Rêzefîlmê 'Mem û Zîn' bi zanebûn xirabkirina destançîroka (efsaneya) mîllî ya kurdan e. Tu nirxên însanî vê xapandin û xirabkirinê qebûl nakin."

Mehmet Yergîn jî bi sernavê "Di zazakî de metnên dînî" nivîsa xwe li ser berhemên olî yên bi zazakî heta niha hatine nivîsandin amade kiriye.