Şaredarê Bajarê Mezin ê Amedê li ser gera Serokwezîr Erdogan a li Amedê axivî û got:

"Birêz serokwezîr we firsend ji dest we çû. Ampûlê AKP'ê li Sûrên Amedê ket û bû parçe parçe."

Serokwezîr Recep Tayyip Erdogan îro li Amedê Plana Çalakiya ji bo GAP'ê eşkere kir. Di dema vê eşkerekirinê de hin rexne li Şaredar Baydemîr jî kir. Li ser vê yekê Baydemîr daxuyaniyeke da çapemeniyê û bersiva Serokwezîr da.
Serokê DTP'a Amedê Nejdet Atalay, Şaredarê Yenîşehîr Firat Anli, Şaredara Baglarê Yurdusev Ozsokmenler, Şaredarê Kayapinarê Zulkuf Karetekin, Şaredarê Erxenî Nadir Bingol, endamên Meclisên Şaredariyan, nûnerên saziyên sivîl û beşek ji gel di dema daxuyaniya Baydemîr de amade bûn.

Baydemîr bi gotina digel nasname û çandê ew beşdarî xebatên aborî û pêşketina civakî jî dibe, ew ji hukumetê li hemberî pirsgirêkê civakî aborî yên giran li bendê ye ku ne li gor hilbijartinê, li gor serdemeke dirêj bernameyeke ji bo herêmê amade bike. Baydemîr da zanîn ku li ser van yekan rapor pêşkêşî hukumetê kiriye û ev rapor pêşkêşî raya giştî jî kiribû.

Şaredar Baydemir da zanîn ku ew bi meraq û hindik be jî bi hêvî li axaftinên Serokwezîr Erdogan guhdarî kiriye û wiha domand: "Mixabin ez bi xemgînî dibêjim ku di axaftina birêz Serokwezîr Erdogan de ji bo gelê herêmê tu tiştekî nehatiye pêşkêş kirin. Baydemîr got ku projeya GAP'ê ku di sala 1976'an de hatiye amade kirin careke din germ kiriye û pêşkêş kiriye û wiha berdewam kir: "Bi çêbûna GAP'ê tiştê herî zêde bê kirin ev e ku encax pê piçekî çandiniya herêmê pêş dikeve. Nexwe ger mirov bibêje dê bi GAP'ê herêm pêş bikeve, ji aliyê daneyên civakî aborî dê herêm bigihîje asta herêmên din ên Tirkiyeyê wê çaxê dê ev yek bê vê wateyê ku mirov bi mirovan henekên xwe dikin."

Şaredarê Bajarê Amedê bang li serokwezîr kir û got: "Ez eşkere dibêjim Birêz Serokwezîr. Firsend ji dest we çû. Vî gelê baweriya xwe bi we anî, ji bo çareserî firsend da we. Baweriya min jî bi we çêbû, min got belkî çareser bike.  6 sal in em li benda we ne. Lê mixabin em xapiyan. Mixabin em xapiyan. We firsend bikar neanî. Niha bi hesabên biçûk ên hilbjartinê hûn dibêjin qey hûnê gelê me bixapînin. Lê bila tu şika we nîn be ev gel êdî naxape. Ampûla AKP'ê li Sûrên Amedê ket û bû parçe parçe."

Hin gotinên Baydemîr:
- Bi destê şewqetê yê Hukumeta AKP'ê her roj ciwanên me dimirin. Zarok, ciwan, extiyarên me dimirin. Copan li dayikan dixin. Gelê Amed, Wan, Culemêrg, Batmanê bi vê destê şewqetê baş dizane. Bila Birêz Serokwezîr bizanibe ku birînên ku vê destê şewqetê vekirine hê baş nebûne. Bila baş bê zanîn ku em bi vê destê şewqetê baş dizanin. Ev 80 sal in bi vê destê şewqetê em têne bi rê ve birin.

- Di serdema Erdogan de di di warê demokratîkbûyîn, azadî û çandê de gav hatine avêtin, lê li herêmê bi xalên 215, 216, 217, 220, 288 û 314'an ên TCK'ê nivîskarên herêmê têne huşkirin. Der barê pirsgirêka kurd de em her ku gotineke dibêjin doz li me têne vekirin.

- Ji 4'ê gelawêja 2006'an heta niha ji ber TMK 7/2'yan der barê 13 rojnameyan de 32 biryarên girtinê hatine dayîn, ji ber ku kurdî bikar aniye şaredar ji kar hatin girtin, meclisa şaredarî hate feshkirin, ji ber vexwendnameyan, ji ber broşuran doz li me hatin vekirin û hemû jî bi destûra Wezareta Karên Hundir doz li me hatin vekirin.

- Birêz Serokwezîr li hemberî perwerdehiya bi kurdî tehamulê jî nake. Heqaretê li nûnerên saziyên sivîl ên ku vê daxwazê tînin ziman dike. Birêz Serokwezîr bi weşana 45 deqîqeyan, bi astengiyên li pêşiya bernameyên zarokan hûn nikarin kurdî biparêzin. Hûn nikarin bi vê derkeve pêşberî asîmîlasyonê ku sûcê mirovahiyê ye

- Birêz Serokwezîr hûn dibêjin Tirkiye li dinyayê xwedî 17'emîn, li Ewropayê jî xwedî 6'emîn aboriya mezin e, baş e gelê herêmê di qada feqîrî û bêparbûnê de di rêza çendan a Neteweyên Yekbûyî de ye? Hûn çima qala vê yekê nakin? Nîvê serjimariya herêmê di bin rêza feqîriyê de dijîn.

- Di navbera salên 2002-2006'an a serdema AKP'ê de 21 bajarên herêmê ku hukumetê teşwîq ji bo wan kiriye sedî 4,4 e, ev teşwîqa 21 bajaran hemû bi qasî Bursa tenê jî nîn e. Bi vê yekê birêz Serokwezîr qala kîjan teşwîq û qîmetdayînê dike?

- Di dema AKP'ê de herêmê hem ji butçeya navendî, hem jî ji para îdareyên mehelî kem par girtiye. Di 200-2007'an dema AKP'ê de li Herêma Marmarayê 33,9 milyan YTL razandin pêk hatiye, razandina ku li Guneydogua û Dogu Anadolu li du herêman hatiye kirin jî ne bi qasî nîvê Herêma Marmara ye.

- Ji ber ku em Heskîfê diparêzin tê gotin ku 'sûîstîmal dikin'. Ev ne sûîstîmal e, ev parastin e, em Heskîfê ji noqavbûnê diparêzin û emê biparêzin jî.

- Birêz Serokwezîr dibêje dê li sê herêman ajansa pêşxistinê saz bikin. Em ev çar sal in ji bo sazkirina ajansa pêşxistinê li Amedê xebatê dikin.

- Li cihê ku birîn bê emeliyetkirin, Serokwezîr tenê derman dike. Bi ve yekê, bi 75 mebûsan dê kes nexape.

- Digel ku me xwest em di nav Platforma GAP'ê de cih bigirin, me nexistin kê. Çima di nav 16 bajarên mezin de tenê şirketên şaredariya me nîn in? Me 5 caran serî lê dan ku em şîrketan vekin serîlêdana me qebûl nekirin. Çima şîrketa me ya ku bi hîbeyê me bi dest xistibû zor li me kirin ku em wê belav bikin?

- Projeya me ya Tesîsa Entegrekirina Çopên Hişk li ser maseya Wezareta Hawirdorê ye. Çima hukumetê ev projeya me ji plana salên 2006-2009'an derxist û xist nava plana salên 2009-2013'an? Pêşketina û dilşadiya vî bajarî pêşketin û dilşadiya Enqereyê ye