Diyarname

Erdhej ne bes bû vê carê lehî li bajarên erdhejê da. Vê sibê  (15.03.2023) di serî de Semsûr û Riha, li herêmê lehî rabû. Li Meletî jî rewş nexweş e. Êvara 17'ê mehê hat ragihandin ku hejmara kesên di lehiyê de mirine derketiye 17'an.

***

SEMSÛR

Li gor agahiyên pêşî li navçeya Tûtê ya Semsûsê konteynerek bi ber lehiyê ve ket. Du kes mirine. Winda jî hene.

Li Semsûrê ava çemê Egrîçay bi ser kolanan de herikî. Bulvara Ataturk tije bû, trafîk rawestiya. Kolan û kuçe bûn lehî.

AFAD'ê ragihand ku ew konên mexdûrên erdhejê vala dikin. 

RIHA

Li Rihayê 12 kesên ku ber bi lehiyê ketine mirine. 5 kes jî winda ne. Lehî li nexweşxaneyan jî da. Navên 11 kesên ji ber lehiyê mirine diyar bûn: Kibar Polat, Naile Polat, Emine Başbug, Muhammed Sabuncu, Omer Faruk Bayaslan, Halil Çoban, Beyem El Derviş, Futeyim El Şahir, Zehra El Beyt, Teybe El Derviş, Halit El Derviş.

Li Rihayê bi taybetî li navçeyên Eyûbiye û Halîliyeyê lehî rabû.

Li Akçakaleyê kesekî bi navê Omer Oturan ku li nav zeviyê bû birûsk lê ket û ew rakirin nexweşxaneyê. Rewşa wî giran e.

Walîtî Rihayê bi ser hesabê xwe yê tora civakî re got, "Beşa Nexweşên Giran a Nexweşxaneya Me Şanliurfa Eyyubiye Egitim ve Araştirma ketiye bin bandora lehiyê, nexweşên me yên li vir dihatin dermankirin rakirin nexweşxaneyeke din. Di vî warî de me hemû tevdîr girtine."

Midûriyeta Tenduristiyê ya Bajêr jî got ku li Beşa Nexweşên Giran a Zarokan ya qata 1'ê hat dîtin ku asta avê bilind bûye. 

waliyê Rihayê Salih Ayhan got ku ev baran barana herî xurt a di salên dawî de bariye ye. Ayhan got ku di meha adarê de bi giştî dor 57 kîlogram baran dibare, tene îro 77 kîlogram baran bariye.

Li Rihayê dibistan ji bo rojek betalkirin 

MELETÎ

Li Wêşanşara Meletî konên mexdûrên erdhejê di bin lehiyê de man. Li Meletî ev 3 roj in baran dibare. Bi hezaran kesên di konan de bi lehiyê re hê zêdetir mexdûr bûn. 

AMED

Li Amedê li ser rêya Farqînê konbajar hatibû danîn, ji ber barana ku li bendê ne ew der hat valakirin. 

HIŞYARIYA METOROLOJÎ

Li aliyê din meterolojî ji bo bajarên kurdan hişyarî belav kir. Heta 20'ê mehê îhtîmala barana gur, lehî û tiştên pêre eleqedar heye. Ji bajaran bi taybetî hişyarî bo Sêwas, Meletî, Semsûr, Mereş, Şirnex, Culemêrgê hatiye kirin.