Qamişlo

Desteya Çand û Hunerê ya Herêma Cizîrê, amadekariyan dike ku 8'emîn Mîhrîcana Wêje û Hunerê ya Jinan lidar bixe. Mîhrîcana ku her sal 8'ê Adarê Roja Jinên Kedkar a Cîhanê de li dar dikeve, îsal bi diruşma “Bi çanda ‘Jin jiyan azadî’ em dê şoreşa hunerê pêk bînin” wê li dar bikeve.

Di nav mîhrîcana ku wê li Navenda Çanda Mihemed Şêxo li dar bikeve de çalakiyên hunerî, govend, şano û helbestxwendin wê hebin. Di vê çarçoveyê de dê pêşangehên wêneyan, pêşangehên amûrên kevnar, destkariyên jinan û cil û bergên kurdan jî bêne pêşkêşkirin.

Li ser mîhrîcanê endama Komîteya Amadekar Evîn Bîlal ji bo ANHA'yê wisa gotiye, “Dirûşma ‘Jin jiyan azadî’ li seranserî cîhanê belav bû. Me xwest vê mihrîcanê ligel belavbûna vê dirûşmê ku jin li Bakur û Rojhilatê Sûriyê dibêjin, li dar bixin û hunera jinan bi naverok û rastiya wê dirûşmê ve girê bidin.”

Şertên serîlêdana mihrîcanê

Komîteya amadekar ji bo şert û mercên qebûlkirina daxwaznameyên tevlîbûnê jî got; “Temenê yên beşdarî mihrîcanê bibin divê ne kêmtirî 18 salî be. Berhem bi sê zimanan; Erebî, Kurdî û Suryanî tên qebûlkirin. Yên dixwazin beşdar bibin, dikarin tenê bi cureyekî hunerê yan çîrok yan helbest yan gotar beşdar bibin.”

Divê berhem nehatibin weşandin, ji zimanekî din nehatibin wergerandin. Hejmara gotinan di çîrok û gotaran de 2 hezar gotin û ya helbestan ji 2 rûpelan ne zêdetir be.

Di mihrîcanê de her wiha pêşbirka destkariyan û hunera şêwekariyê dê li dar bikeve. Li gorî endama komîteya amadekar, komîteya nirxandinê ya mîhrîcanê ji jinên herêmê û derveyî wê pêk tê.

Yên bixwazin dikarin heta 24'ê vê mehê berhemên xwe bigihînin ber destên komîteya amadekera.