QELADIZ

Bi qasî 30 sal in Hosta Mihemed karê çêkirina sopeyên daran û amêrên din ên ji saç tên çêkirin dike. Rojane gelek kes ji bo kirîna sopeyên daran serdana wî dikin. Hosta Mihemed diyar kir ku îsal ji ber nebûna neftê xwesteka li ser sopeyên dar ji sedî 80’ê zêde bûye û ev yek jî metirsiyek mezin dixe li ser daristanên deverê.

Derfetên welatiyên nîn in ew qas neftê bikirin 

Hosta Mihemed karê çêkirina sopeyên dara, menqel, tank û hwd dike. Ew xelkê bajaroka Qeladiz a ser bi îdareya Raperîn e. Hosta Mihemed ku li nava dikana xwe de bi karê çêkirina sopeyên daran ve mijûl bû, derbarê karê xwe de axivî. Wî, îşaret bi xwezaya herêmê kir û got: “Ev herêmek zozan e, hewayek gelek sar lê heye. Befir û baranek zêde lê dibare. Derfetên welatiyan nîn e di zivistanê de ewqas neft bikirin, ji ber wê neçar dibin sopeyên daran bikar tînin. Ev jî pirsgirêkek mezin a jîngehê bi xwe re tîne.”

‘Kirîna sobeyan sedî 80 zêde bûye’

Hosta Mihemed da zanîn ku îsal ji ber nebûna neftê xwesteka li ser sopeyên dar ji sedî 80’ê zêde kiriye û ev yek jî wekî metirsiyek mezin a li ser daristanên deverê bi nav kir. Mihemed daxwaz kir ku hikumet neft bi ser welatiyan de dabeş bike. Her wiha got, ger rewş bi vî rengî berdewam bike, heta du salên din wê daristanên Kurdistanê ber bi tunebûnê ve herin.

‘Welatê berê xwe didin sobeyên me’

Li bazarê de gelek cureyên sopeyên daran ên ji Tirkiye û Îranê hatine hene, lê Hosta Mihemed dibêje, “Welatî zêdetir berê xwe didin sopeyên ku em li vir çêdikin. Ji ber hem qalîteya wan baştir û qayîmtir in, hem jî şêwazê wan ciwantir in. Hinek sopeyên em çêdikin, dikarin zêdetirî 10 salan werin bikaranîn.”

Rojnews

Hosta Mihemed dibêje bila hikumet neftê bi ser welatiyan de dabeş bike.