Diyarname

25’emîn tûrnûvaya fûtbolê ya Kûpaya Kendavê li bajarê Besra yê Iraqê îro destpê kir. Bi vê yekê piştî 44 salan cara yekem e ku Iraq mazûvaniya Kûpaya Kendavê dike. Merasima destpêkirina tûrnûvayê li Stada Cidî el-Nahl a li Besrayê li dar ket. 55 hezar temaşevan di merasima destpêkirina tûnûvayê de amade bûn. Tûrnûva bi lîstika di navbera Iraq û Ummanê dest pê kir, lê her du tîman nekarî zora hev bibin. Maç bi 0-0 bi dawî bû.

Tûrnûva di navbera 6-19’ê mehê de dê li dar be. 8 tîm di nav tûrnûvayê de hene ku li du koman parve bûne.

Tîmên Koman

Koma yekem ji tîmên Iraq, Erebistana Siûdî, Umman û Yemenê pêk tê. Ev tîm dê lîstikên xwe li Stada Besrayê bilîzin.

Koma duyem jî ji tîmên Qatar, Îmarat, Behreyn û Kuweytê pêk tê. Ev jî dê maçên xwe li Stada Mînayê bilîzin.

Di sala 2010’an de Iraq ji bo mazûvaniya kûpayê hatibû hilbijartin lê ji ber fikarên ewlehiyê yên li Iraqê her taloq bûbû û li welatên din ev tûrnûva li dar ketibû.

Berî vê di sala 1979’an de li Bexdayê tûrnûvaya Kûpaya Kendavê li dar ketibû û piştî wê heta niha Iraqê nikaribû mazûvanî bike.

Serokwezîrê Iraqê Mihemmerd Şiya es-Sudanî di merasima destpêkirinê de axivî û got ku ev ji organîzasyona fûtbolê wêdetir şahiya biratî û piştgiriyê ye û got, “Basra mala hemû Kendav û ciwanên ereb e. Iraq dilşad e ku piştî salan dost û birayên xwe li vê derê dike mêvan.”

Di tûrnûvayê de lîstikvanên kurd

Serokê Herêma Kurdistana Federal Nêçîrvan Barzanî jî beşdarî merasima destpêkirina tûrnûvayê bû. Barzanî ligel hin rêveber û Waliyê Hewlêrê çû Besrayê.

Li aliyê din di nava tîma neteweyî ya Iraqê de 5 lîstikvanên kurd hene. Teknîk dîrektorê spanyolî Jesus Casas tîma neteweyî ya Iraqê bi rê ve dibe. Alay Fazil, Rêwan Emîn, Ehmed Yasîn, Şêrko Kerîm û Aso Rustem wekî lîstikvanên kurd di nav tîmê de cih digirin.

Ehmed Yasîn li Orebro ya Swêdê, Rêwan Emîn û Şêrko Kerîm li Dalkurdê dilîzin.

Dîroka Tûrnûvayê: Herî zêde Kuweyt bi ser ketiye 

Bi navê xwe yê fermî Tûrnûvaya Kûpaya Neteweyên Kendavê di sala 1968’an de dest pê kir. 8 welatên Kendavê beşdar dibin. Tûrnûva du salan carek li dar dikeve lê carinan ji ber sedemên siyasî ev derketiye 3 an 4 salan carek.  Di sala 1968’an de Behreyn, Kuweyt, Erebistana Siûdî û Qatar beşdarî Olîmpiyatên Havînê yên li Meksîkayê dibin û bi vî awayî biryara vê tûrnûvayê didin. Lê bi awayekî fermî di sala 1970’ê de yekemîn car li Beyreynê li dar dikeve. Vê salê Kuweyt bi ser dikeve û kûpayê digire. Heta niha herî zêde Kuweytê ev kûpa bi dest xistiye. Tam 10 caran Kuweytê kûpa biriye mala xwe. Paşê Erebistana Siûdî, Iraq û Qatar tên ku her yekî 3 caran kûpa girtiye.  Îmarat û Ummanê her yekî 2 caran serketina xwe ragihandiye û Behreyn jî bi carek di nav serketiyên vê kûpayê de cih girtiye.. 

Di merasima destpêkirina tûrnûvayê ku li Stada Cidî el-Nahl a li Besrayê li dar ket de 55 hezar temaşevan amade bûn.