Diyarname

Li Meclisa Tirkiyeyê hevdîtinên li ser butçeyê hebûn. Di hevdîtinan de mebûs li ser navê xwe û partiya xwe diaxivin. Mebûsê HDP’ê yê Amedê Îmam Taşçier dema xwest axaftina xwe bi kurdî bike Wekîlê Serokê Meclisa Tirkiyeyê Haydar Akar got, “Ji bo em hemû jê fêm bikin divê tu bi zimanê fermî tirkî biaxivî” û mîkrofonê Taşçier girt.

Akar ku mebûsê CHP’ê ye got ku zimanê wî yê zikmakî gurcî ye, li ber kursî ew jî çend peyvan dike, lê paşê vedigere tirkî, ji bo bê fêmkirin bi temamî axaftina xwe ew bi tirkî dike.

Mebûsê kurd Taşçier israr kir ku hemû axaftina xwe bi kurdî bike, Wekîlê Serokê Meclisê Akar li ser vê bi temamî mîkrofona Taşçier girt.

Li ser vê yekê Wekîla Koma HDP’ê Meral Daniş Beştaş rabû ser piyan û got, “Axaftina bi kurdî ji aliyê xetîban ve ji bo tirkî tê wergerandin. Derdê me, yan jî derdê xetîben nefêmkirin ku li vir bi sedan mebûsên kurdî fêm dikin jî hene. Dibe ji pêncan çarê meclisê fêm nekin lê ez îdîa dikim ji pêncan yekê wê fêm dikin. Ev ziman zimanê 30 mîlyon kurdên ku li Tirkiyeyê dijîn e. Ma kurd ne hemwelatiyên Komara Tirkiyeyê ne, ew jî bacê nadin? Serokê Meclisê bi xwe dibêje ‘Bi zimanekî derveyî tirkî bê axivîn, dikare bibe lê ev hevok wekî jêrenot têne nivîsandin. Duh di nav axaftina Hevseroka me Pervin Buldan, berdevka partiya me Ebru Gunay de gotinên ‘Jin, jiyan, azadî’ hebûn. Li vê meclisê yan jî li vê dinyayê yên ku wateya jin, jiyan azadî nizanibin hene? Lê va ne hene ku li belgeyên meclisê wekî jêrenot têne lêkirin. Birîna axaftina mebûsê me helwesteke despot e.”

Akar di bersiva xwe de diyar kir ku ew ne dijî zimanê zikmakî ye, lê ger em fêm nekin em destûrê nadin. 

Li ser berdewamkirina nîqaşan navber dan hevdîtinên li meclisê.