Diyarname
Mebûsê Sêrtê yê DTP'ê Osman Ozçelîk ji bo Newroz bibe "Cejna Aştî û Azadiyê" pêşniyarqanûnek da meclisê.
Ozçelîk ji bo ku 21'ê Adarê Cejna Newrozê di meclisê de wekî "Cejna Aştî û Azadî" bê pejirandin, ew roj bikeve asta roja cejnê û wekî tatîl bê îlankirin Pêşniyarqanûneke pêşkêşî meclisê kir. Osman Ozçelîk da zanîn ku 21'ê adarê ji aliyê Neteweyên Yekbûyî ve wekî "Roja Têkoşîna bi Nijadperestiyê re" qebûl kiriye û rojeke wisa ger wekî cejn bê qebûlkirin dê hem xizmeteke ji bo aştiyê bike, hem jî dê bibe piştgirî ji bo têkoşîna bi nijadperestiyê re.
Mebûsê DTP'ê Ozçelîk li ser vê yekê îro tevî mebûsên DTP'ê Şeraffetin Halis, Hamit Geylani û Akın Birdal li meclisê daxuyaniyeke da çapemeniyê.
Ozçelîk xwest ku Xala 2'yan a Cejnên Neteweyî û Tatîlên Giştî ya bi hejmara 2429'an bê guhartin û 21'ê Adarê wekî "21'ê Adarê Cejna Aştî û Azadiyê Newroz e" bê qebûlkirin.
Osman Ozçelik da zanîn ku dîroka cejna Newrozê digihîje 4 hezar û 350 sal berî niha û li ser peyva Newrozê jî da zanîn ku peyveke ku ji kurdî tê; wekî New û Roz e, bûye Newroz
Li ser pirsa rojnamegeran a "Şaredarê Amedê Baydemîr gotiye 'Rojekê dê navê van axan bê naskirin' xwestiye çi bibêje" Ozçelîk wisa got: "Vê mijarê ji birêz Baydemîr bipirsin. Min li ser daxuyaniya wî lêkolîn nekiriye."
Li ser pirsa "Gotinên Baydemîr ên 'Têkoşîna kurdan a 20 salan' tê çi wateyê" jî Osman Ozçelîk wisa got: "Ez bawerim birêz Baydemîr qala têkoşîna demokratîk legal a ji HEP'ê heta niha dike."
Li ser pirsa operasyona Ergenekonê jî Akin Bîrdal bersiv da û wisa got: "Operasyon divê heta Susurlukê berfireh bibe. Divê careke din rapora Susurlukê bê lêkolandin û tiştên divên bêne bicihanîn. Divê bi van operasyonan bi sînor nemîne û heta dawiyê here."
***
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.