Diyarname

Îro maça Batman Petrol Spor û Hendekê hebû. Batmanê bi 2-1 tîma Hendekê têk bir û berî lîg bi dawî bibe bû şampiyon.

Tîma fûtbolê ya Batman Petrol Sporê di Lîga 3’yemîn a TFF’ê de dilîze. Di Lîga 3’yemîn de 3 kom hene û Batman Petrol di Koma 1’emîn de bû. Di vê komê de 18 tîm hene. Û îro maçên hefteya 31’emîn hatin lîstin. Di van maçan de Batman Petrolê li Stada Batman Yenîşehîrê tîma Hendek Sporê kir mêvan. 

Batman Petrol bi kelevan Cihan Şenturk, Abdulsamet Kirim, Erdi Bakirci, Okan Toprak, Ali Kemal Başaran, Aykut Çift, Hasan Çavdar, Akin Akman, Emre Pehlivan, Samet Aydin û Îlyas Ural dest bi maçê kir.  Tîma mêvan Hendek Spor di deqîxeya 9’an de bi gola Yavuz Alemdar 1-0 derket pêş. Dûre Batmanê di deqîxeya 28’an de bi Aykut Çift bersiv da û nîveka yekemîn 1-1 bi dawî bû. Di nîveka duyemîn de Akin Akman di deqîxeya 67’an de gola ku Batman Petrol Spor derxist şampiyonî qeyd kir.

Bi vê encamê di dawiya hefteya 31’ê de Batman Petrol Spor bi 68 pûan di rêza yekemîn de ye. Tîma  Belediye Kutahya Spor jî bi 57 pûan di rêza duyemîn de ye. Berî lîg bi dawî bibe bi 3 hefteyan Batman Petrol Sporê şampiyoniya xwe ragihand.

Ev bû 26 sal Batman Petrol Spor negihîştibû encameke wisa. Bi vê re temaşevanên Batmanê êvarê li Stadê hatin ba hev û şampiyonî pîroz kirin. Batman Petrol Spor bi vê şampiyonyê derbasî Lîga 2’yemîn bû. Sala bê Batman Petrol Spor dê di Lîga 2’yemîn a TFF’ê de bilîze.

AMED SPORÊ PEYAM BELAV KIR

Bi şampiyoniya Batmanê re klûba Amed Sporê bi ser hesabê xwe yê fermî yê tora civakî re peyama pîrozbahiyê ji bo Batman Petrolê belav kir. Amed Sporê got em şampiyoniya Batman Petrolê pîroz kiri û di Lîga 2’yemîn de jêre serketinê dixwazin.