Diyarname

Hunermend Tara Mamedova û Harûn Elkî vê carê bi strana “Seva Çi” hatin ba hev û singla xwe pêşkêş kirin. Single bi ser youtube ra hat belavkirin.

Her du hunermend berê di xebatên “Şehyan” de hatibûn ba hev, careke din di xebateke de ligel hev kar kirin û singlek pêşkêş kirine. Singela ku navê “Seva Çi” lê kirine gotin û muzîkên wê aîdê Tara Mamedovane. Vîdeo klîba xebatê li ser hemû platformên muzîkê û her wiha li ser hesabê wan ê youtube hat belavkirin.

Li ser pirsa “Seva Çi çawa derket holê?” hûnermendan wisa gotiye: “Li çar alîyê dinyayê dawî li şer, birçîbûn, mirina zarok, ciwan û jinan nayê. Xewnên me tije tirs, dil û giyanê me tije endîşe ne. Em nikarin sibehan bi aramî ji xew hişyar bibin û li kûçeyan bi rehetî bigerin. Em nikarin ji dil bikenin. Kenê me her tim nîvco û tehl e. Ev dinyaya ku rojekê em ê hemî jê bar bikin, çima evqas li me teng bûye? Çima dilê me xweş nabe? Em ji bo kê dijîn û ji bo kê dimirim? Ji bo çi dilê me bi ciwanî pîr dibe? Zaroktiya me winda dibe. Çima em nabin wek xwe? Li gel ku em naxwazin jî, em her timî ji bo memnûnîyeta hin kesên din têdikoşin... Em wek jin, mêr, zarok, ciwan û pîr, hemî  bi hev re êşê dikişînin û pirê caran bêyî ku em sedema vî tiştî bipirsin, vî halî qebûl dikin û jiyana xwe berdewam dikin. ‘Seva çi’ tam jî bi hestên lêpirsîna vê janê û xwe spartina ronahiya hûndirîn û lêgerîna hêviyê, hatiye nivîsandin.”

Aranjeya stranê Serkan Duran kiriye û derhêneriya klîbê jî Murat Arik kiriye.

KUNYE:

Seva Çi 

Gotin: Beste/Awaz: Tara Mamedova

Aranje :Serkan Duran

Mix&Mastering: Erman Aydoner 

Studio: Harûn Elkî

Violin,Buzuki,Cûmbûş,Ûd, 

Percussion:Serkan Duran.

Bass Gitar : Şener Yilmaz 

Gîtar: Harun Elkî

Klarnet, Duduk: Erdi Arslan

Wêne: Murat Arik 

Klîb

Derhêner: Murat Arık

Derhênerê Dîtbarî yê: Aykut Tûtûncû

Honak-Montaj: Akan Açıksoz

Ew kî ne?

Tara Mamedova:

Zaroktiya hunermenda navdar Tara Mamedova li  Kirgizistan û Rusyayê derbas bûye û perwerdehiya xwe ya muzîkê li Fransayê domandiye. Li wê derê bi hevnasîna hunermendên kuçeyan re berê xwe dayê Jazzê, lê piştre awazên muzîka rûsî ya romans bi zimanê xwe yê dayikê yê kurdî ve kelijand û yekemîn albuma xwe ya bi navê "Ax" derxist. Tara Mamedova ligel hunermenda navdar a cîhanî Yasmîn Levy, ji gelek hunermendên navdar re beste çêkirine. Bi tevahî sê albûmên wê “Live Studio Sassion İstanbul”, “Giran" û gelek xebatên wê yên single hene.

Harûn Elkî:

Harûn Elkî di sala 1975'an de li Bêtûşebaba Şernexê hatiye dinê. Dibistana seretayî û navîn li wir qedandiye. Di sala 1997'an li Edeneyê tevlî Koma Rewşen a girêdayî Navenda Çanda Mezopotamyayê bûye û bi vî awayî wekî solîst dest bi jiyana  profesyonel a muzîkariyê kiriye. Di sala 2002'yan de albuma xwe ya yekemîn a bi navê "Asê" û di sala 2005'an de albûma xwe ya bi navê "Pola Nû" derxistiye. Heta niha ji bo gelek stranên gelek hunermendan karê aranjeyê kiriye.

Va ye ew stran û klîb: