Ferîd XELÎL/ QAMIŞLO

Ji bo cara pêşîn li rojavayê Kurdistanê, ji mamostayên dibistanan û xwendekarên zanîngehê, 20 kesan perwerdeya kirmanckî (zazakî) bi dawî kir û bawernameyên xwe wergirtin.

Sazîya Zimanê Kurdî li Qamişloyê, 04.11.2021’ê ji bo belavkirina bawernameyên xwendekarên perwerdeya zazakî ahengek danî.

Perwerdeyê 4 mehan dom kir. Naveroka perwerdeyê ji waneyên rêziman, rastnivîsîn, rastaxaftin û wergerê pêk dihat.

Mamosteya perwerde bi rê ve dibir, Xecê, di biwara vê perwerdeyê da ji bo Diyarnameyê got, "Nêzîkatiyên kurmancîaxêvên Rojava li hemberî zazakî pir germ û jidil e. Di proseya perwerdehiyê de, xwendekaran roj li pey rojê li xwe zêde dikir. Aniha têkilîyeka wan a xurt hem bi nivîsara zazakî re hem jî bi muzîka zazakî re dirust bûye."

Ji 2011’an ve li dibistanan û navendên fêrkirinê, zimanê kurdî\kurmancîya latînî, fermî û serbest tê dayîn. Belê cara ewil e li Rojava perwerdeya ji bo zaravayê zazakî tê lidarxistin. 

Ji bo rojên bê jî, mamoste Xecê wisa got: "Mimkûn e asta duyem jî bê ragihandin û ev perwerde heta qonaxên bilindtir bê domandin qene xwendekarên li vir ji asta fêrbûnê bigihîjin asta fêrkirinê."

Hevseroka SZK’yê Vîyan Cûdî jî ji bo Diyarnameyê got ku her çi qas kurdên Rojava bi temamî kurmancîaxêv in jî, "belê armanca pêşîn û dawîn a SZK’yê, bixwedîderketina li hemî zaravayan e."

Cûdî her wiha got, "Ji bo ku meriv bikare li bara kurdiyê da xebatên berketî yên akademîk encam bide, pêwîst e hemî zaravayan bizane û di lêkolînên zanistî de wan bide ber hev. Loma ne tenê zazakî, her çi zaravayên kurdî ku hene, em ê guh bidinê û hewl bidin bi rêya perwerdehiyê û lêkolînan, bidin pêş."

Sazîya Zimanê Kurdî (SZK) navenda wê li Qamişloyê ye. Berê, tenê xebatên perwerdeyê bi rê ve dibirin. Ji du salan bi şûn de, bi rêya berhem û komxebatan, bêhtir di qada zimannasiyê de dixebite û hewl dide li ser hemû zaravayên zimanê kurdî bixebite.