Diyarname

Li Iraqê hilbijartina giştî çêbû û temam bû. Bi vê re partiyên ku bi ser ketin jî diyar bû. Hejmara mebûsên kurd ku dê herin Parlemena Iraqê jî diyar bû. Li Iraqê Tevgera Sadir bi 73 kursiyan bûye yekemîn. Li aliyê kurdan jî rewş ev e ku partiyên kurdan bi temamî 60 mebûs bi dest xistine. Dema bibin yek bi vê li Iraqê dikarin bibin şirîkê mezin ê hikumetê. Li Meclisa Iraqê 329 kursî hene.

Va ne encamên giştî:

- Komîsyona Hilbijartinê ragihand ku beşdarî sedî 41 çêbûye. Ji sala 2003'yan ve ev beşdariya herî kêm bû. Li hin bajaran kêmtir bû.

- Li temamê Iraqê Tevgera Sadir bi ser ket. Tevgerê 73 kursî girtin.

- Partiya Teqedûm (Partiya Serokê berê yê Iraqê Mihemed Helbûsî): 38 kursî girtin.

- Hevpeymaniya Dewleta Qanûnî (Yê Nûrî Malikî) 37 kursî girtin

- Li Herêma Kurdistana Federe PDK bi ser ket. PDK'ê 32 kursî bi dest xistin. Ji partiyên din YNK'ê 15 kursî, Nifşê Nû 9 kursî, Komeleya Yekgirtûya Îslamî 4 kursî girtin.

REWŞA BAJARAN

- Li Hewlêrê PDK'ê 11 kurkî, Nifşê Nû 3 kursî û YNK'ê kursiyek bi destxistiye.

- Li Silêmanî YNK'ê 8 kursî, Nifşê Nû 5 munbî, Yekgirtû 2, PDK û Komeleyê 1 kursî girtin.

- Li Neynewayê PDK'ê 9 Kursî, YNK jî 2 kursî girtin.

- Li Kerkûkê YNK'ê 3 kursî, PDK'ê 2 kursî û Nifşê Nû kursiyek girt. Li Kerkûkê 13 kursî hene.

YNK'Ê ENCAMÊN HEWLÊRÊ RED KIR

Berpirsê Encûmena Bilind a Hilbijartinan a YNK'ê yê Hewlêrê Mecîd Mihemed Emîn got ku ew encamanên Hewlêrê red dikin. Emîn qala sextekariyê kir û wisa got: "Berendamê me 28 hezar deng girtine û bûye duyemîn lê ew ketiye rêza çaremîn."

Emîn diyar kir ku di vî warî de belgeyên wan hene û ji bo îtîrazê serî li Komîsyona Bilind dane. 

Li aliyê din li Şengalê jî PADÊ encama hilbijartinê red kir û îdîa kir ku saxtekarî heye.

***

Nûçeya eleqedar:
- Hilbijartina Iraqê, Herêma Kurdistana Federe (hin encam, HAT NÛKIRIN)