Diyarname

Şivan Perwer li ser rewşa dawî axivî û got ku kî neyê danûstandina niyetxirab e û ev lê zêde kir, "Ger bixwazin ez dikarim herim Hewlêrê û navbeynkarîbikim."

Ozanê bi nav û deng Şivan Perwer şeva yekşemiyê tevlî bernameyeke taybet ya Sterk TV bû û bersiva pirsên rojnameger Gulistan Çiya Ike, Diyar Ciwan û Hindirên Hewraman da.

Ji rojeva siyasî bigire heta mijarên dîrokî û hunerî Perwer bersiv da gelek pirsan.

Pirsa pêşî ku ji Şivan Perwer hat kirin aloziya di navbera PKKê û PDK de bû ku ev demeke li başûrê Kurdistanê êdî gihîştiye asteya şerekî germ yê navxweyî.

RÊYA MAQÛL

Perwer pir vekirî, şerê nava kurdan wekî felaket û malkambaxî pênase kir û got: "Eger hêzên kurd şerê hev bikin tu fêdeya kurdan jê çênabe, tenê dewletên desthilatdar û dinya alemê bi xwe dikenînin. Rêya herî maqûl danustendin e. Kî rêya diyalogê û danûstendinê red bike ew şerxwaz û niyetxirab e."

Li ser pirsa temaşevanan, Perwer got bi şertê ku aliyên dijber qebûl bikin, ew amade ye wekî navbeynkar biçe Hewlêrê û meseleyên bi nakok bi aliyan re biaxive û eger îcab bike ew dikare li hember hevkuştina keç û xortên kurdan xwe bike mertalê zindî jî.

Li ser pirsekê, Şivan Perwer pergala siyasî û aborî ya li başûrê Kurdistanê rexne kir û bal kişand ser dewlemendbûna neheq ya hin rêvebirên siyasî.

RÊBAZA MELE MISTEFA BARZANÎ

Perwer da zanîn li ser van rexneyan hin derdoran xwestin çûyîna başûrê Kurdistanê lê qedexe bikin û wiha axivî: "Rêbaza Mele Mustefa Barzanî baş bû, li ser ked, xebat û tekoşînê ava bûbû. Di rêbaza wî de edalet û parvekirin hebû. Kek Mesûd jî dişibe bavê xwe. Lê ev nifşa nû ne wisa ye. Ew di nava pereyan de mezin bûn. Ji ked û edaletê dûrketine. Pir heyf e. Piştî ew qas, ked, xebat û xwîna bi hezaran pêşmergeyan, behsa mal û milkê xwe û pereyên xwe dikin mirov aciz dibe."

Hunermendê navdar di navbera her mijarî de bi israr got ew di siyaseta nava partiyan de tu car alî nagire û ew dixwaze kesayetiya xwe ya hunermend û netewî biparêze.

ÇÛYÎNA AMEDÊ

Mijareke din ku derheqê wê de hem rojnamegeran hem jî temaşevanan pirs jê kirin, di sala 2013'yan de tevlîbûna wî ya mîtînga AKP'ê ya li Amedê bû ku bi Îbrahîm Tatlises re cara yekem derketibû ser heman sahneyê. Şivan Perwer wiha axivî: "Gelek kesan çûyîna min ya Amedê wekî xiyanet pênase kirin, lê ev ne rast e. Di deh salan de, pirî caran AKP mirov şandin pey min ji bo ez biçin Stenbol yan jî Amedê, lê min tim red kir. Lê dem hat pêvajoya aştiyê çêbû, atmosfer nerm bû, li ser îsrara Kek Mesûd Barzanî min qebûl kir pê re biçim Amedê. Me hêvî kir ku çareseriyeke bêşer çêbe. Lê min fêm kir ku hemû sozên ku rêvebirên Tirkiyeyê didin tev derew in, defik in. Rîca min ji kurdan ew e ku tu car baweriya xwe bi sozên wan neynin."

XWEZAYA MEZOPOTAMYAYÊ

Şivan di dema wê çûyîna xwe de, derheqê xwezaya Mezopotamyayê de jî behsa çavdêriyên xwe kir û got: "Ji Sînorê Îbrahîm Xelî heta Amedê em di ber Dîcle re derbas bûn, ez rastî tu daristanekê nehatim. Ava Dîcle ku dikare rih û can bide xwezaya heremê vala diherikî. Fêde jê nehatibû dîtin. Dar, daristan bax û bostan nehatibûn çandin. Meyfa min pê hat. Ez pir li ber ketim ku mêjiyê civaka me hê nehatiye wê astê ku karibe qet nebe xwezaya xwe geş bike."

OZAL BANGÎ MIN KIR

Bi mijara çûyîna Tirkiyeyê re girêdayî Şivan Perwer behsa diyaloga xwe ya bi Serokomarê berê yê Tirkiyeyê Turgul Ozal re kir û got "Hê di sala 1989'an de, ji min re têlefonek hat, gotin Turgut Ozal dixwaze bi te re biaxive, ez şaş mam. Min rahişt têlefonê, erê Turgut Ozal bû. Ji min re got were em meselaya kurdî hal bikin. Min got ma hûnê bi min çawa çareser bikin. Tu hêzeke min ê siyasî tune ye. Ez tenê hunermenkî me. Eger niyeta we hebe, ya baş hûn vê mijarê bi muxatabên xwe yên siyasî re biaxivin. Piştî demekî ji xwe bi rêzdar Ocalan re ket tekiliyê û agirbest pêk hat."
DAXWAZA ÇÛYÎNA ROJAVA

Derheqê mijarên hunerî de jî Şivan Perwer da xuya kirin hêz û tecrubeya wî îro ji herdemê zêdetir e, ew amadekariya albumeke nû dike û got: "Eger organîzasyoneke were amade kirin û ew were vexwendin ew bi kêfxweşî dixwaze biçe rojavayê Kurdsitanê jî."

Şivan Perwer got, "Ger her du alî bixwazin ez amade me wekî navbeynkar herim Hewlêrê û meseleyên bi nakok bi aliyan re biaxivim."