RÊZAN MIHEMED / ROJNEWS
Îro serê sibê şandeya YNK û Tevgera Goran li Polîtburoya YNK’ê li bajarê Silêmaniyê civiyan. Di civînê de mijara pêkanîna xala di lihevkirinê de ya rêveberiya herêmî ya ku di roja 9.12.2014’an de di navbera her du aliyan de hatibû îmzekirin, hat gotûbêjkirin.
Şandeya YNK’ê pêk dihat ji Hakim Qadir, Refet Ebdullah, Şêx Letîf û Berzan Ehmed û Şandeya Goran jî pêk dihat ji; Celal Cewher, Omer Seyîd Elî û Aso Mehmûd.
Di civînê de bi berfirehî li ser vê mijarê hat gotûbêjkirin. Biryar hat girtin ku di roja 21.8.2016’an de xalên di lihevkirinê de pêk werin. Li gor vê biryarê wê di serî de Waliyê Silêmaniyê Dr. Aso Ferîdûn û Waliyên Helebce, Germiyan û Raperîn werin guhertin.
Li gor lihevkirina sala 2014 ya di navbera her du aliyan de du salan YNK û du salan jî Goran erka Walîtiyê digire. Niha YNK erka Walîtiyê radestî Goran dike.