Enqere
Piştî êrîşa li ser avahiya HDP'Ya Îzmîrê û kuştina Deniz Poyraz Hevserokê HDP'ê Mithat Sancar ligel mebûsên HDP'ê li Navenda Giştî ya HDP'ê daxuyanî da çapemeniyê û got, "Ev ne êrîşeke ji rêzê ye. Îro li avahiya rêxistina me ya Îzmîrê civînek hebû. Nêzî 40 kes dê rêveberên me hebûna. Civîn berê hatibû plankirin lê ji ber hin karên lezgîn me betal kiribû. Îro tam wê saetê de êrîş kirine, ev êrîşeke bi plan e, xwestine qetlîameke mezin bikin. Em kesên ku ev qetlîam plan kirine ji nêz ve nas dikin. Jixwe hevalên ku çûne li avahiya Îzmîrê mêze kirine gotine ku ev wisa ne meseleya yek du guleyan e, ji ber ku bi temamî ew der daye ber guleyan. Ev qetlîam di heman demê de provakasyon e. Divê her kes baş vê bibîne ku ev provakasyoneke bi talûke ye."
Sancar bal kişand ser bûyerên navbera 7'ê pûşperê û 1'ê sermaweza 2015'an û got ku ew bê sebeb van bûyeran bibîr naxin û wisa got; "Wê demê jî heman plan hebûn, êrîş avahiyên me kirin, xebatkarên me hatin kuştin, li meydanan bombe teqandin, bi sedan kes mirin, welat xwîn girt."
Sancar got ku plana desthilatdarî ya kaosê heye û bal kişand ser gotina Serokê Giştî yê AKP'ê ku li Rizeyê ji bo Seroka Îyî Partî gotibû ev rojên we yên baş in.
Hevserokê HDP'ê Sancar diyar kir ku ev sale û nîvek e bi sedema provakasyonan ji hin derdoran kesan dişînin wir, ligel ku gelek erebeyên polîs û emriyetê li derdora avahiyê ne jî êrîşkar îro bi çek çûye avahiyê û bi sedan polîsên li wan deran ew nedîtiye. Sancar wisa got: "Emê li dû van hemûyan bin. Bi rêya hiqûqê emê hesabê bipirsin, bi rêya siyaseta demokratîk emê provakasyonan pûç derxin. Emê miheqeq bi rêya demokrasiyê, bi sindoqê, li ber gel ji van provakatoran hesabê bipirsin."
Sancar diyar kir ku tenê hedef ne HDP ye, dixwazin kaosek çêbikin û pevçûneke navxweyî xistine faliyetê. Sancar wisa dom kir: "Haya me ji vê kaosê heye. êşa me mezin e, hêrsa me mezin e lê biryardariya me ya di siyaseta demokratîk de bi qasî hêrs û êşa me mezin e. HDP hay ji provakasyonan heye. Ev desthilatdarî ji bo temenê xwe dirêj bike serî li her rêyê dide. Ji bo em bi rêya hiqûqê vê pûç derxin emê heta dawî têbikoşin. Bila tu şika kesî nîn e. HDP ji bo pêşerojê, ewlehiya pêşeroja demokratîk û aştiyê ye."
Her wiha Sancar bang li her kesê ku alîgirê demokrasî, aştî û edaletê ye û xwest ku li dora HDP'ê kom bibin.
Li aliyê din Sancar diyar kir ku Hevseroka HDP'ê Pervin Buldan ji bo here Îzmîrê ji Stenbolê ketiye rê û wan li Navenda HDP'ê Navenda Kordînasyona Qeyranê ava kiriye û ji wir bi rê ve dibin.
**
Nûçeya Eleqedar:
- Agahiyên berfireh li ser kuştina Deniz Poyraz