Cemil OGUZ

Êdî em bi rehetî dikarin bibêjin di her warî de sînemaya kurdî berheman dide û ber bi pêş ve diçe. Beşek ji vê sînemayê jî beşa anîmasyonê ye. Di çarçoveya Festîvala Fîlmên Kurdî a Global de çend fîlmên anîmasyonî jî têne nîşandayîn û hin ji wan gelek serketî ne jî. Ya herî serketî jî "Dar" (Wood) e.

TU DARÊ, DAR TE DIBIRE

Festîvala Fîlmên Kurdî ya Global îsal 16'ê mehê dest pê kir û heta 27'ê mehê li dar e. Ji ber meseleya pandemiyê festîval îsal jî bi awayekî online û bê pere li dar dikeve. 13 Festîvalên Kurdan piştgiriya vê festîvalê dikin û fîlmên xwe şandine. Di festîvalê, di beşa fîlmên kurt de çend anîmasyon hene û di nav wan de min "Dar" (Wood) gelek eciband.

Derhênerê "Dar" Yasîn Zahrabî kurdekî Kermanşahê ye. "Dar" meseleya birîna daran digire dest. Di anîmasyonê de her daran dibirin. Her bi temaşevanan re meraq çêdibe dê ber bi ku ve here ku ev yek xweşik jî çêkiriye. Paşê kamyona ku dar bar kirine, dibe wan daran li cihek dirijîne erdê û ji wir jî kamyonên din wan daran dibin. Ji wan yek diçe fabrîkeya kaxiz ku ji daran kaxizan diafirînin. Yek jî diçe fabrîkeya amûran ku bi van kursî û mase, tiştên wisa çêdikin. Heta vir normal e, lê hew em dibînin ji wî kaxizî fermana îdamê tê dayîn, di sehneya dû re de jî sêdar hatiye çêkirin û ew darê ku bûye kursî, ew kursî ji bin lingê kes tê kişandin.

Derhêner mijara mirov daran dibirin dikin berhem, ew berhem tên ba hev û mirovan dikujin digire dest. Her çiqas li vir me mijara anîmasyonê 5 deqîqeyî anî ziman jî em gotina mezinên kurdan "Dîtin û gotin nabe yek" bibîr dixin û pêşniyara temaşekirinê dikin.

RENGÊN ŞÎRÎN Û FERHADÊ

Anîmasyonê "Şîrîn û Ferhad" ji aliyê derhêner Rahim Karimzah ve hatiye çêkirin. Anîmasyonekî ji nav çandê derdikeve û ji nav jiyanê re diherike. Derbasbûna kareyek ji kareyeke din, ji rengek heta rengek din wisa xweş honaye, temaşevan nikare dest jê berde. Yek ji anîmasyonê serketî jî ev bû.

"XULA NEWE"

"Xula Newe" (Rotation) jî anîmasyonê derhêner Hazhir As'adi ye. As'adî ji kurdên Senedecê ye û di anîmasyona xwe ya 7 deqîqeyî de veguherîna dinyayê tîne ziman.

"KERWAN"

"Kerwan" anîmasyonê Mohiuddin Arslan e; berê xwe daye Efrîna hat bombekirin, efrîniyên ji cih û warên xwe veder bûn, koçber bûn. Heta vir anîmasyonekî serketî ye, lê di dawiyê de fotoyên rasteqîn ên efrîniyan bi cih kirine ku qet ne hewce bûn.

"DE BERDE"

"De Berde" jî anîmasyonekî kurt e, bi 2 deqîqeyî ye û balkêş e. Derhêner Star Bazancir di 2 deqîqeyan de bûyera xwe aniye ziman.

"XEYALÊN DI KÛRAHIYÊ DE"

"Xeyalên di Kûrahiyê de" anîmasyonê derhêner Reza Mohammadi ye. Mohammadî ji kurdên Rojhilat e û heta niha Festîvala Fîlman a Berlînê jî têde di gelek festîvalan de xelat girtiye. Di vê anîmasyonê xwe de qala kesên ji şeran direvin û di nav behran de winda dibin aniye ziman.

Festîval van anîmasyon, kurtefîlmên din, belgefîlm û fîlmên metrajdirêj ên derhênerên kurd bi ser malpera xwe re bê pere nîşan dide. Di festîvalê de ev 6 kurteanîmasyon, fîlm û belgefîlmên din heta 27'ê mehê li benda temaşevan in.

Ji bo yên bixwazin temaşe bikin:

- FESTÎVALA FÎLMÊN KURDÎ YA GLOBAL

***

Nûçeya Eleqedar:

- Fîlmên kurdî li benda we ne