Diyarname
Di Roja Zimanê Zikmakî de ev agahiyeke xweş e: Biryar hat girtin ku Hevserokên HDP'ê jî têde hemû rêveberên HDP'ê dê perwerdehiya zimanê kurdî bibînin.
Li gor nûçeya Emrullah Acar a di Ajansa Mezpopotamyayê de Hevberdevkê Komîsyona Şopandina Nexşerêya Kurdî Salîm Kaplan diyar kiriye ku li dijî polîtîkaya pişaftinê ya li ser zimanê kurdî wê tekoşîna xwe bilindtir bikin.
Kaplan diyar kiriye ku ji bo HDP’ê hemû ziman girîng in û têkildarî polîtîkayên ziman ên partiya xwe ev tişt gotin: “HDP’ê di rêziknameya xwe de diyar kiriye ku pir zimanî, çandî, olî diparêze. Ji ber xetereya li ser zimanê kurdî bi destê HDP’ê ji bo lê xwedî derketina kurdî têkoşîneke bêhampa tê dayîn. Di pêşerojê de jî ji bo zimanê kurdî bibe zimanê perwerdehiyê û zimanê fermî helwest nîşan dabû. Gelek caran ji bo li meclisê komîsyona zimanê kurdî were avakirin û zimanê kurdî di zagonan de cih bigire gelek kar û xebatên HDP’ê çêbûn. Lê mixabin hin nakokiyên me hebûn. Ev nakokî çi bûn? Di nav partiyê de jî zimanê kurdî wekî zimanekî esasî nehat rûniştandin. Kêmasiyên HDP hebûn, wekî rexnedayî em dikarin nêzîk bibin. Gelek caran ji dostên me jî di vê çerçoveyê de de rexne dihatin.”
KOMÎSYON HAT AVAKIRIN
Kaplan, destnîşan kir ji bo ku li gorî rêziknameya xwe li zimanê kurdî xwedî derkevin û polîtîkayên pişaftinê bişikînin pêwistî bi gavavêtina wan hebû û wiha domand: “Jixwe HDP têkoşîna zimanê zikmakî wekî polîtikayeke esasî dimeşîne, di nava partiyê de ji bo ku zimanê kurdî bibe zimanê esasî kar û xebatek hewce bû. Ji ber vê yekê komîsyonek hat avakirin, ev komîsyon xwe bi navê şopandina nexşerêya zimanê kurdî da pênasekirin. Ev komîsyon ji 2 hevalên LRN’ê (Lijneya Rêveberiya Navendî), hevalekî MP’ê (Meclisa Partiyê), 4 hevalên parlementer û 4 şêwirmendan pêk tê."
KOMÎSYON DÊ ÇI BIKE?
Li ser komîsyon dê çi bike jî Selîm Kaplan wisa got: “Destpêkê ji bo ku zimanê kurdî di nava partiyê de bibe zimanê bingehîn wê li tevahiya rêxistinên navçe û bajaran; di nava MP, LRN, koma meclisê, koma şêwirmendan de perwerdeya zimanê kurdî bê destpêkirin. Wê ev perwerdehî di 21’ê Sibatê/Reşemiyê de dest pê bike. Destpêkê wê 200 kes di nav van de şêwirmend, parlementer, endamên LRN’ê, MP’ê, hevserokên navçe û bajaran jî hene tevlî perwerdehiyê bibin. Wê her du hevserokên giştî yên HDP’ê Pervîn Bûldan û Mîthat Sancar jî bibin şagirtê perwerdeya zimanê kurdî. Kar û barê komîsyonê ne tenê perwerde ye. Di heman deme de wê komîsyon ji bo zimanê kurdî bibe zimanê perwerdehiyê û zimanê fermî jî têbikoşe. Ji bo vê komîsyoneke dîplomasiya zimanê kurdî jî hat avakirin. Wê ev komîsyon girêdayî komîsyona nexşerêya zimanê kurdî xebatên xwe bike. Ziman êdî nayê parestin tê qetilkirin. Ji bo ev rewş bê teşhîrkirin dê komîsyonek di nav xebatên me di cih bigire. Wê Enstîtuya Kurdî, Med-Der, gelek rewşenbîr û nivîskar ji bo zimanê kurdî bi komîsyona me re bixebitin.”