Diyarname

Li çend bajarên Herêma Kurdistana Federe çend meh berê çalakiyên protestoyî hebûn. Di dema wan çalakiyan de gelek aktîvîst û rojnameger hatin girtin. Roja 16'ê mehê darizandina wan hebû. Dadgeha Hewlêrê her yek 6 sal cezayê hepsê li wan birî.

Ji rojnamegeran Şêrwan Şêrwanî, Guhdar Zebarî û Eyaz Kerem, ji aktîvîstan Şivan Seîd Omar û Harîwan Îsa bi îdîaya "serbixwebûna welat, yekîtî û ewlehiya welat lawaz kirine" hatin darizandin û hatin cezakirin.
HIN ÎDÎAYÊN LI SER ASAYÎŞA BAŞÛR

Piştî biryara dadgehê rojnameger Şasiwar Mame ji ser hesabê xwe yê twittirê re hin agahiyên balkêş belav kirin. Mame ev agahî belav kirin:

- Rojnamevan Şêrwan Şêrwanî îro di runîştina dadgehê de li hember dadwer got: “Asayîşê gefa tecawiza cinsî ya hevjîna min li min kiriye ger ez îtiraf nekim.”

- Şêrwan Şêrwanî îro li dadgehê bi dengek bilind gotiye: “Alîyên siyasî yên desthilatdar li herêma Kurdistanê, dadwer û dadgehê ji bo tunekirina azadîya raderbirîn û rojnamegerîyê bi kar tînin.”

- Rojnamevan Eyaz Kerem red kiriye li dijî asayîşa neteweyî pere ji derve girtibe.

Dadwer: Lê çima kesekî du kartên Korek a telefonê (10$) û yekî din (Behcet) li derve 200$ ji te re şandiye?

Eyaz: Ev kart diyarîya hevalekî bû di cejnê de. Behcet jî ji malbata min e û 200$ daye min.

-Di dema dadgehkirinê de rojnamevan Şêrwan Şêrwanî ji parlemanter Elî Heme Salih re gotiye: “Ne girîng e çiqas cezayê girtîgehê didin min, lê ji kerema xwe tu rastîyên vê rûnîştinê ji xelkê Kurdistanê re vebêje. Bila wisa nefikrin ez sîxûr im û girêdayî destekî derve me.”

31 PARLEMENTER DIJÎ DADGEHÊ DERKETIN

Li aliyê din 31 parlemanterên herêma Kurdistanê li dijî biryara dadgeha Hewlêrê derketin û daxwaz ji dadgeha pêdaçûnê dikin vê biryarê nepejrîne.

Parlemanter dibêjin ku berî dadgehê biryara sûcdarkirin û cezakirina rojnameger û çalakên Behdînan ji aliyê Mesrûr Barzanî ve hatibû dayîn.

NERAZÎBÛN

Sendîkaya Rojnamegeran bi çalakiyê daxuyaniyeke da çapemeniyê, xwest kesên hatine girtin bêne berdan û wiha got: “Pêwîst e Herêma Kurdistanê hemû azadiya fikir û çalakiyên sivîlî mîsoger bike û serweriya yasa biparêze. Divê dadgeh bê alîbe. Divê biryara girtina çalakvanan ji pêşbaziya siyasî û binpêkirina serweriya yasa dûr be. Pêwîste yasaya rojnamegerî ya hejmara 35 a sala 2007’an ji bo kesên rojnameger were bikaranîn. Em daxwaza azadkirina van welatiyan dikin."

Li bajarê Silêmanî û Helebçeyê jî bi çalakiyan biryara dadgehê hat şermezarkirin