Fethî Balaman / BATMAN / MA

Nivîskar Çetîn Lodî ku 28 sal in etariyê dike, heya niha 4 pirtûkên wî hatine çapkirin.

Nivîskar Çetîn Lodî (43), li gundê Lodî yê navçeya Dihê ya Sêrtê hatiye dinê û di 12 saliya xwe de tevî malbata xwe koçî Êlihê kiriye. Piştî hatine Êlihê, wî û bavê xwe dest bi etariyê kiriye. Lodî ku ji sala 1990'î ve heya niha çerçîtiyê dike, tu tax û gundên bajêr nemane ku lê negeriyaye. Di salên 2011-2013'yan de ji bo kurdî çûye Kurdî-Derê. Paşê dest bi nivîsandina pirtûkan kiriye. Pirtûka wî ya ewil a helbestan "Rê û Rê" di 15'ê hezîrana/pûşpera 2013'yan de derketiye û piştî vê, pirtûka wî ya diduyan a helbestan "Çavên Şevînî" hatiye weşandin.

PIRTÛK Û ÇERÇÎTΠ 

Her wiha bi navê "Şîva Miriyan" pirtûkeke wî ya helbestan û bi navê "Evîn û Mirin" jî romanek wî ji weşanên NA'yê çap bûne. Pirtûka wî ya helbestan a diduyan "Çavên Şevînî" çapa duyem kiriye. Di romana xwe ya "Evîn û Mirin" de jî bal kişandiye ser cinayetên kiryar nediyar, valakirina gundan û kuştina Parlementerê DEP'ê Mehmet Sîncar ku tevî Metîn Ozdemîr li Êlihê bi êrîşeke çekdarî hatibû kuştin. 

PIRTÛKA WÎ YA NÛ DERKET 

Lodî ku jixwe bi kurdî dizanibû lê ji bo pêşxistina zimanê xwe yê nivîskî hewl daye û wisa dibêje: "Ji bo karibim bi zimanekî akademîk binivîsim çûm Kurdî-Derê. Piştî du salan min asta mamostetiyê qedand. Dû re min ev pirtûk nivîsandin. 3 pirtûkên helbestan û romanek. Herî dawî jî 3 pirtûkên min ku ji sala 2016'an ve li ser wan dixebitîm, hefteya borî derketin." 

Lodî, anî ziman ku ew bi roj etariyê dike û êvarî jî li ser pirtûkan hûr dibe û wiha dom kir: "Bi roj kuçe bi kuçe, tax bi tax û gund bi gund digerim û etariyê dikim. Bi şev saet di 11'an de dest bi nivîsandinê dikim, heya 4'ê sibê. Piştî xeweke 5 saetan cardin etariyê dikim. Wexta etariyê dikim, em û kesên pirtûkhez sohbetan dikin. Dixwazin di pirtûka xwe ya nû de behsa çîroka wan jî bikim. Carinan dev ji kar ber didim, bi saetan guh li wan dikim. Çîrokên gelekan jê, ecêb in." 

‘EZ BÛM ŞAHIDÊ GELEK BÛYERAN'

Lodî, diyar kir ku di etariyê de bûye şahidê gelek êş, azar, kêfxweşî û jiyana mirovan û di berhemên xwe de jî behsa van tiştan dike. 

Lodî bal kişand ser girîngiya berhemên nivîskî yên kurdî jî û bang li her kesî kir ku kurdî bikin perçeyek ji jiyana xwe.