Amed
Navenda Giştî ya KURDÎ-DER'ê û TZPKurdî li ser êrîşa li dijî şaxa KURDÎ-DER'ê ya Rihayê û girtina rojnameya Azadiya Welat daxuyanî da çapemeniyê.
Di daxuyaniya ku li Navenda Giştî ya KURÎ-DER'ê ji aliyê rêveberê KURDÎ-DER'ê Rifhat Ozturk ve hate xwendin de, hate gotin ku çav li rê bû ku piştî hilbijardinên 2011’an guhertinên baş pêk bihata, lê berevajî van hêvî û bendewariyan, tiştên xetere û tirsnak rû dan. Ozturk wiha got: "Wan di pêvajoya hilbijartinan de qewl û sozên ku dabûn gel, jixwe pêk neanîn, bi ser de ji zimanê gel re jî tehemûl nekirin û êrîşî komeleya me kirin. Serokwezîr ku di hemû daxuyani û axaftınên xwe de dîgot; ‘înkar rabûye, red nîn e û asîmîlasyon tune ye.' di navbera du heyvan de du caran ji aliyê polîsên hikumeta AKP’ê ve li ser şaxa komeleya me ya Rihayê êrîş pêk hatiye."
Ozturk, destnîşan kir ku li aliyekê TRT 6’ê vedikin û li aliyê din cara 9'emîn e li tekane rojnameya ku bi kurdî weşanê dike Azadiya Welat ceza tê birîn û weşana wê tê rawestandin. Ozturk wisa got: "Di salekê de bi sedan dibistan û zanîngeh li Tirkiyeyê ji bo perwerdehiya zimanê tirkî tên vekirin, ji bo zimanê birayên xwe yên kurd jî çêkirina dibistanan li aliyekî, bi ser de jî komeleyên ku li ser zimanê kurdî xebatê dikin, her roj bi zext û pêkutiyan re rû bi rû dimînin. Ev êrîşên ku ji aliyê dewlet û hikumeta AKP’ê ve li hemberî şaxa komeleya me ya Rihayê pêk hatine napejirînin, bi tundî şermezar dikin û dibêjin dê gelê kurd tu car li ber van pest û pêkûtiyan seri netewîne."