Diyarname
Romana nivîskar Cîhan Roj bi navê "Meşa Moriyan" ji Weşanên Evrenselê derket.

Nivîskarê malpera me Cîhan Roj romana xwe ya nû bi navê "Meşa Moriyan" derxist.

Mijara romana "Meşa Moriyan" li Heskîfê derbas dibe. Lehengê romanê Mîralî ku kurd e lê li metropolan mezin bûye, zanîngeha xwe qedandiye, bêyî haya wî ji tiştinan hebe ji bo mamostetî bike hatiye Heskîfê.

Mîralî, Osman, Alîta, Esma, Elî, Xanim, Semîre û hinên din... Her yek xwedî taybetiyek e û li der û dora Mîralî ne; her yek bi awayekî bandorê lê dike.
Mîralî evîndar dibe, çalakiyan li dar dixe, tê tehdîd kirine, hin dixwazin wî bikujin... Lê ji her tiştî wêdetir her evîndar e; dema deriyeke evînî lê tê girtin, yekê din lê vedibe û di dawiyê de digihîje mirazê xwe jî.

Roman digel zimanê xwe yê herikbar, xwedî sembolan e. Ew sembol carinan dibin deqên li ser zikê keçikê hatine çêkirin; carinan dibe kevirek biçûk a bi dîwara Sûrê ve ku li ber ketinê ye...

Roman digel gelek pirsên din, herî dawî vê pirsên dike: "Hûn ê karibin jiyana xwe bi çend gotinan bi nav bikin?" Dibe ku dixwaze bi çend gotinan hin aliyên jiyanê bi ser zimanê wêjeyê bixe...

"Meşa Moriyan" ku ji 137 rûpelî pêk tê ji Weşanên Evrenselê derketiye ku niha li Fûara Pirtûkan a Amedê* di standa Evrenselê de jî tê firotin.