Diyarname
Weşanxaneya Ronahî vê carê 6 pirtûkan bi hev re pêşkêş dike. Ji van du yê helbestan, du roman û du heb jî lêkolîn in.

Weşanxaneya Ronahî ya ku berî du salan li Amedê ji aliyê Mihemed Ronahî ve hat avakirin heta niha ji bo weşandina pirtûkên gavên girîng avêt; vê carê 6 pirtûk bi hev re derxist.

Lêkolina Helîm Yûsiv li ser romanê

Nivîskarê malpera me Helîm Yûsiv ku heta niha li ser romanê lêkolîn kiribû û gelek gotar nivîsandibû, niha li ser romana kurdî bi navê “Romana Kurdî” pirtûkek derxist. Pirtûka Yûsiv ji bo meraqdar û hezkiriyên wêjeyê dê bibe çavkaniyeke girîng.
Di “Romana Kurdî” de Yûsiv li ser dîrok û pêvajoya romana kurdî, qonaxên romana kurdî yek bi yek sekiniye û xebateke berfireh li ser roman kurdî pêşkêş kiriye.
Ji romana kurdan a pêşî heya romnên sala 2010’an li ser wan hemûyan sekiniye û fikrên xwe yên di der barê romana kurdî de nivîsandiye.

“Vejîna Felsefeyê”

Lêkolîna din ku ji Weşanên Ronahî derketiye li ser felsefeyê ye û lêkolînerê kurd Abdulqadîr Gok nivîsandiye. Gok, li ser felsefeyê xebat kiriye, dîroka felsefeyê, şaxên felsefeyê û beşên wê yek bi yek girtine dest. Di pirtûkê de ji felsefeya Zerdeşt bigire heta yên din bi awayekî dorfireh li ser felsefeyê sekiniye.

Dîwana Ehmed Huseynî

Ji helbestan yek jê bi navê “Navekî kuştî ji navên te yên kesk bûm” ku ji aliyê Ehmed Huseynî ve hatiye nivîsîn e. Ehmed Huseynî ev dîwana xwe li ser  Şêx Maşûq Xeznewî nivîsiye û berhema xwe diyarî wî kiriye. Berhem bi tevahî ji helbestekê û “Êşgotin”ekê pêk tê.

“Piştî Xezal Terqiyan”

Pirtûka helbesta din ya ku derketiye ya nivîskarê malpera me Şêxmûs Sefer e ku bi navê “Piştî Xezal Terqiyan” hatiye weşandin. Sefer, dîwana xwe ji 46 helbestan pêk aniye. Di beşeke “Piştî Xezal Terqiyan” de wisa dibêje Sefer:
“Ezê hej te bikim
Her gav hinekî din
Piştî te min hişt û çû jî…

Ezê hej te bikim
Her gav hinekî din
Piştî te min kuşt û çû jî…”

“Li Peravên Torê, Torên Evînê”

Ji her du romanan yek bi navê “Li Peravên Torê, Torên Evînê” ye ku ji aliyê Çidem Baran ve hatiye nivîsandin ku yekemîn romana wê ye. Çidem Baran, di pêşbaziya çîrokan ya Abdulah Dûran de xelata yekemîniyê girtibû û niha jî di 25 saliya xwe de romana xwe ya pêşîn pêşkêş dike. Romana wê li herêma Torê diqewime. Çand jiyan û civaka herêma Torê û têkiliyên wê deverê bi awayekî wêjeyî li pêş çavan raxistiye. Bi gotina wê romana “evîneke serjêkirî” hûnaye ji xwendekêr re.
Wisa dinivîse Baran: "Ez ne Ehmedê Xanî me ku agirê evîna xwe di dîwanekê de binivîsim û wesa dilê xwe bi wê dîwanê bînim. Ez ne Baba Tahirê Uryan im ku janên evîna xwe bi zimanekî tazî pêşkêş bikim. Ez xwediyê evîneke serjêkirî me. Were li min vegere ferîşteha giyanê min, rûmeta dilê min î wêran bûyî."

“Guhar”

Romana duyem ku ji Ronahî derketiye bi navê “Guhar” e ku Eyub Guven nivîsandiye.
Nivîskar Eyub Guven  di vê romana xwe xwe ya duyemîn de qira ermeniyan bi awayekî wêjeyî girtiye dest û ji wê trajediyê parçeyek li tevna xwe xistiye.