Mehmud Nêşite

“Grûba Xebate ya Vateyî” kombîyayîşê xo yê 19. Dîyarbekir de Otêla Grand Gulerî de viraşt. Na grube şeş aşman ra reyêk cayêk de kom bena û tayê çekuyan û terman standarte kena. Nê çarês serrîyê ke na grûbe bi nê usulî xebata xo domnena. Hetanî nika 19 rey kom bîya û nêzdîyê 7-8 hezar çekuyî standarte kerdî. Bê standartekerdişê nê çekuyan tayê termî zî açarnayî kirmanckî (zazakî) û usul û quralanê rastnuştişî ser zî vinderta.

Grûbe, kombîyayîşê xo yê 19. zî bi nê usulî Dîyarbekir de viraşt. Grûbe na rey “Tayê Çîyê Muhîmî”, “Termê Beledîye û Şaristanî” û “Nameyê Meslegan” kerdî rojeva xo û ser o munaqeşe kerd.

 Sey heme kombîyayîşan no kombîyayîş zî Munzur Çemî îdare kerd. Roja yewine derheqê rojeve û derheqê xebata “Buroyê Vateyî yê Dîyarbekirî” de malumat ame dayîş. Dima derheqê tayê çîyanê muhîman de, M.Malmîsanij seba rastnuştişî babetêka tenge ser o vindert û na babete ser o munaqeşe virazîya. Grûbe, dima dest bi munaqeşeya babeta “Termê Beledîye û Şaristanî” kerd.

Kombîyayîşî roja 21ê na aşme de dest pêkerd û hetanî roja 24ê na aşme dewam kerd. Nê çar rojan de endamê nê kombîyayîşî her roje saete 9.00 de salona na otêle de kom bîyêne û hetanî saete 17.30 babeta terman munaqeşe kerdêne.

Na rey nê 21 kesî beşdarê nê kombîyayîşî bîyî: “Cemal Pîranij, Deniz Gunduz, Doxan Karasu, Ehmedê Dirihî, Huseyîn Kulu, Îshaq Tepe, J.  Îhsan Espar,  M. Malmîsanij, Mehemed Selîm Uzun, Mehmud Nêşite, Munzur Çem,Muzafer Xeylanij, Netîce Altun, Polat Aydin, Roşan Lezgîn, Serdar Bedirxan, Seyîdxan Kurij, Silêman Yilmaz, Şukru Urgun, Tekîn Agacik, Zulkîf Demirtaş”.

Seke tay wendoxî zî zanê na babete ser o verê cû zî di kombîyayîşî virazîyabî. Ê her di kombîyayîşê verênî hetê “Beledîyaya Şaristanê Girdî ya Dîyarbekirî” ra organîze bibî. Nê kombîyayîşan ra, kombîyayîşo verên seba lehçeya kurmanckî û ê dîyin zî seba lehçeya kirmanckî (zazakî) organîze bîbî. Nê her di kombîyayîşan de zî cîya-cîya kesî amebî pêser û nê termî tirkî ra açarnabî kurmanckî û kirmanckî.

O wext, tay medya û tay keyepelan de, zafane zî yê kirmanckî ser o rexneyê zaf tujî virazîyabî. Hetanî ke nê medya û keyepelan goreyê zanayîşê xo tay nimuneyî zî dabîy.

Nê termî pêro pîya 270 hebî bî. Grûba Xebate ya Vateyî nê kombîyayîşê xo de nê terman ra hebêk-di hebî tede ney, heme termî açarnayî kirmanckî. Ez wazena nê terman ra çend heban pêşkêşê şima wendoxan bikerî.

basin odasi : odaya çapemenîye

basin yayin bürosu : buroyê çapemenîye û weşanî

basin yayin şube müdürlüğü: mudirîya beşê weşan û çapemenîye

basin yayin ve halkla ilişkiler müdürlüğü :mudirîya çapemenîye-weşan û şarî reyde têkilî.

başkan yardimcisi: 1)hetkarê/a serekî 2) hetkarê/a sereke

bilgi işlem ve bilgi yönetimi müdürlüğü:mudirîya îdareyê zanakirarî û zanayîşî

bütçe ve finans şube müdürlüğü:mudirîya beşê butçe û fînansî

büyükşehir belediye başkani:sereka/ê beledîyaya şaristanê girdî

büyükşehir belediye meclisi:meclîsê beledîyaya şaristanê girdî.

canli hayv.bors. ve mezb. şube müdürlüğü:mudirîya beşê pawitiş/seveknayîş û kontrolê doruverî

kanalizasyon dairesi başkanlığı: serekîya dayîreyê kanalîzasyonî.

kanalizasyon işletme, bakım ve onarım şube müdürlüğü: mudirîya beşê xebitnayîş/sazgeh, ciewnîyayîş û tamîrê kanalîzasîyonî.

sağlık işleri dairesi başkanlığı:serekîya dayîreyê karanê weşîye

sivil savunma uzmanlığı:pîsporîya pawitişê sivîlî.

sosyal hizmet ve yardım işleri müdürlüğü:mudirîya karanê xizmetê cematkî û hetkarî.

Na grûbe, goreyê usulê xo roja peyêne yê kombîyayîşî de tarîx, rojeve û cayê kombîyayîşêko bêro tespît kena. Nê kombîyayîşî de zî winî kerd. Grube do şeş aşmî badî pê yanî kombîyayîşê 20. Mêrdîn de virazo û do ser termanê sînema, tîyatro, muzîk û konsertuwarî vindero.

**

Malpera Kirkdi.com ra hamiya girotişî