DiyarName.Com

8'ê mehê, nûçeyên li ser Rojava...

...ev tê nûkirin...

Komîteya Koçberên Serêkaniyê: Em dosyaya vegerê dişopînin
Di demên dawîn de der barê vegera xelkên bajarê Serêkaniyê yê dagirkirî bo malên xwe, hinek nûçe û agahî belav bûn. Li ser mijarê Komîteya Koçberên Serêkaniyê ragihand ku ew dosyaya vegera şêniyan bo malên xwe dişopîne û eger tu geşedanek der barê mijarê de çêbû ew ê xelkê agahdar bike.
Komîteyê bi daxuyaniyekê diyar kir ku ew bi awayekî çalak dosyaya koçberan bi aliyên têkildar re gotûbêj dike û dişopîne da ku ji bo vegereke bi rûmet şert û mercên ewle peyda bike.
Komîteyê di daxuyanya xwe de got, eger tu geşedanek der barê mijarê çêbû ew ê xelkê agahdar bike û ew ê bi xwe vegera xelkê birêxistin bike.
**

Li balafirgeha Qamişloyê hevdîtina HSD û Şamê
Di çarçoveya peymana di navbera hikumeta demkî ya Sûriyeyê û HSDˊê de li balafirgeha Qamişlo civînek hat lidarxistin.
Şandeya hikumeta demkî ya Sûriyeyê îro piştî nîvro hat balafirgeha Qamişlo. Şandeya Şamê li vir bi şandeya Hêzên Ewlekariya Hundirîn (Asayîş) a bi serokatiya fermandar Mehmûd Xelîl Elî re rûnişt. Di civînê de mijara balafirgehê hat gotûbêjkirin. Hat gotin ku biryar e heta 20 rojan Balafirgeha Navneteweyî ya Qamişlo carek dest bi xebata rêwiyan bike. (Ronahî tV)
**

Rêveberiya Kobanî: Tevî sozan jî hikumeta demkî tu gav neavêtine
Rêveberiya Kobanî daxuyanî da û diyar kir tevî sozên ku nûnerên hikumeta demkî di civîna li Helebê de dane jî, heta niha ji aliyê wê ve gavên berbiçav nehatine avêtin, bi taybetî vekişîna hêzên leşkerî ji Çelebiyê û rakirina dorpêça li ser bajarê Kobanî.
Rêveberî bi vî rengî bang li hikumeta Şamê kir, "Em bang li hikumeta Şamê dikin ku erkên dikevin ser milê xwe bi cih bîne û gavên pêwîst temam bike, bi taybetî vekişandina hêzên leşkerî ji gundên di nav sînorên îdarî yên herêma Kobanê de, rakirina dorpêça li ser bajêr û rakirina astengiyên li pêşiya dabînkirina xizmetguzariyên bingehîn ji bo şêniyan.” (ANHA)
**

Îlham Ehmed: Destkeftiyên mezin dê bên bidestxistin
Yekitiya Rewşenbîran a Kantona Cizîrê têkildarî rewşa dawî ya li Sûriyeyê û peymana 29'ê Rêbendanê ya di navbera HSD û hikumeta demkî ya Şamê de, civînek li Pirtûkxaneya Şilêr a li Qamişloyê li dar xist.
Daîreya Pêwendiyên Derve ya Rêveberiya Xweser Îlham Ehmed li ser rewşa dawî axivî.
Va ne hin gotinên Ehmet:
Îlham Ehmed behsa pêvajoya heyî kir û wiha got: “Projeyek bi pêş ketibû, projeyek ji bo azadiya gelan bû. Lê niha hinek hesasiyet çêbûye. Bi taybet di mijara mafên gelan de. Di vî warî de gelek hesasiyet heye. Hinek jî dixwazin bi vê hesasiytê şerê navxweyî çêbe, gelek hewldan jî hene, bi taybet di navbera gelan de. Divê em hişyar bin.
'XWESTIN KURDAN MÊ MAF Û NASNAME BIHÊLIN'
- Doza gelê kurd wekî ku li ser axa xwe ya dîrokî dijî, li beramberî wê siyasetên desthilatê yên ku hatine meşandin, hem demografiya heremê û zîhniyeta dane rûniştandin heya niha hewldanên heyî li ser esasê şeytankirina vî gelî ye. Bê maf û nasname hiştine. Hê li ser van kar dikin. Her wiha hin kes ji bo vê siyasetê dibin amûr.
'DIXWAZIN KURDAN JI HOLÊ RAKIN'
- Dixwazin gelê Kurd ji holê rakin, armac jî û siyaset gelek diyar e. Me di destpêkê de hewl da em pêşiyê bigirin. Pêşiya fitne û fesada heyî bigirin. Her wiha gelê me bibe xwedî maf. Biryara ku ji hêla hikumeta demkî ve derketiye ya ji bo mafê gelê kurd, cara yekem ku biryareke wiha derdikeve ku kurd bibin xwedî biryar û nasname. Ev biryareke erênî ye. Ev yek jî dê bê şopandin. Her wiha şopandina wan biryaran ji hêla siyasî û qanûnî de em çawa dikarin bi cih bikin û paratîka wê li ser erdê pêk were.
MESELEYA ENTEGRASYONÊ û ZAGONA BINGEHÎN
- Li ser entegrasyonê, Wê firqe û lîwa ji bo Hesekê û Kobanî çêbin û hevalên jin jî cihê xwe di nav de bigirin. Her wiha ji bo mijara saziyên sivîl û çandî û ziman jî dê lihevkirin bê kirin. Muhafizê Hesekê diyar bû. Her wiha hin xal hene wekî deriyên sînor û ziman û hwd, nîqaş li ser wan tên kirin. Her wiha komîteyeke fermî ji bo destûrê nehatiye çêkirin, lê agahî dan ku komîteyek bê avakirin.
'YEKÎTIYA KURDAN A DÎROKÎ ÇÊBÛ'
- Lîstikeke pir xerab heye. Divê em ji van lîstikan hişyar bin û bi têkoşîna siyasî em wan têk bibin. Armanca dijmin têkbirina gelê kurd bû, lê rola gelê kurd li pêş çavan bû. Yekîtiya kurdan a dîrokî çêbûye. Rih û destkeftiyên Rojava ev yekitî daye avakirin. Gotin, nivîsandin û pênûs ji fişekekê xurtir in. Di destûrê de dê mafên gelê kurd mîsoger bibin û em destkeftiyên mezintir bi dest bixin. Her astengiyeke derdikeve, em ê çareseriyekî bibînin. Her wiha ji bo koçberên Efrîn û Serêkaniyê û tevahiya koçberan xebat tê meşandin. (ANHA)

Heyeta Asayîşa Kobanî çû Helebê
Heyeta Hêzên Asayîşa bajarî Kobanê ji bo hevdîtinan çû Helebê. Heyet ji hevseroka Hêzên Asayîşa Kobanî Arîn Kobanî û hejmarek endamên Hêzên Asayîşê pêk tê, li avahiya Hêzên Ewlekariya Hundirîn a Helebê, ji aliyê fermandarê Hêzên Ewlekariya Hundirîn ê Helebê Mihemed Ebdulxenî ve hat pêşwazîkirin.
Di civînê de çawaniya tensîqkirinê ji bo rakirina dorpêça li ser bajarê Kobanî, mekanîzmayên hevkariyê di navbera hêzên ewlehiyê li Kobanî û gundewarê wî ku rewşa ewlehî baş bibe û tevgera şêniyan hêsan bibe hatin nîqaşkirin.
**

Zanîngeha Kobanî xwest komkujiya Xerab Îşkê were lêkolînkirin
Komên hikumeta demkî yên Sûriyeyê roja 25’ê Rêbendanê/Çileya li gundê Xerab Îşkê yê Kobanî komkujî pêk anîn. Di vê komkujiyê de ji malbatekê 5 kes hatin kuştin, 5 jî birîndar bûn. Yek ji qurbaniyên komkujiyê xwendekara Zanîngeha Kobanî Fatima Hec Mehmûd e ku ji her du lingên xwe bû.
Fatima Hec Mehmûd ji ber lingên wê jêkirine li ser ereboka bi teker bû, kesên daxuyanî dan jî çong dan, hatin asta wê û bi vî awayî daxuyanî dan.
Bi amadebûna Fatima Hec Mechmûd, xwendekar, mamoste û xebatkarên Zanîngeha Kobanî kom bûn û der barê mijarê da daxuyaniyek. Wan wêneyên kesên di komkujiyê de hatin kuştin û wê Fatima Hec Mehmûd hildan. Daxuyanî bi zimanên kurdî û erebî ji aliyê xwendekarên bi navên Silava Ehmed û Nûjîn Ebdê ve hat xwendin
Di daxuyaniyê de wisa hat gotin: “Yek ji qurbaniyên komkujiyê Fatma Hec Mehmûd e. Fatma xwendekara sala yekemîn a beşa mafnasiyê ye. Di êrîşa li ser gundê Xerab Îşkê de ji her du lingên xwe bû.”
Di dewama daxuyaniyê de wisa hat gotin “Zarokek çawa ku hîn nû çavên xwe li dinyayê venekiriye bê dê û bav dimîne. Komkujî, kuştin, birîndarî û bobelatên ku li pêşiya çavên zarok û ciwanên me rû didin, bandorek xirab li derûniya wê dike. Bi sedan birînên mezin ên bê bersiv vekirine, gelo di derûniya we de çi vekiriye? Hûn qet vê pirsê ji xwe dikin?. Peyv nikarin mezinahiya vê trajediyeya bi serê xwendekara me û malbata wê de hatiye, vebêjin. Fatma ne bi tenê navekî normal di zanîngehê de ye, lê mînakeke ji bo azwerî û biryardariyê û destpêka xewneke pîşeyî di ber rêya edalet û hiqûqê de ye. Gava ku maseyên xwendinê û xewnên pêşerojê veguhere bîranîkek biêş û wêranker, ma ev ne cihê dax û şermezariyê ye? Ev bûyer birîneke ku wijdanê me hemûyan diêşîne.”
Di daxuyaniyê de piştgiriya exlaqî û mirovî ji Fatma û malbata wê re hat nîşandan ku ku bi rihetî bigihîje mafên xwe yên rewa.
Wan bang li saziyên navneteweyî û yên mafên mirovan jî kirin û gotin “Destên xwe deynin ser wijdanê xwe û bi cidî li van kiryarên hovane binêrin. Bi rêya yasayan dest bi lêpirsînê bikin da ku sivîl werin parastin û nebin qurbana şerên hovane.”
**

Nivîsgeha Pêwendiyan a Kobanî sedemên arîşeya înternetê zelal kirin
Nivîsgeha Peywendiyan a bajarê Kobanî têkildarî arîşeya qutbûna internetê daxuyaniyek da. Hevseroka Nivîsgehê Evîn Şêx Ehmed li pêş avahiya Nivîsgeha Pêwendiyan a Kobanî bi beşdarbûna endamên nivîsgehê daxuyaniyek da.
Evîn diyar kir ku ji 18'ê Rêbendayê/Çileyê ve înternet li ser Kobanî qut e, centrala ku înternetê dide Kobanî bi temamî xera bû, kabloyên înternetê didin bajêr bi zanabûn hatine qutkirin, alavên li ser centralê hatine dizîn.
Evîn Şêx Ehmed anî ziman ku qutbûna înternetê ji ser bajarê Kobanî atmosfêreke nakokî û tevliheviyê çêkir, ji ber girîngiya înternetê wekî kehrebê û avê girîng e. Li gel dubarebûna bang û hewldanên têkildanîna bi aliyên eleqedar re ku derbasî centralê bibin û pirsgirêkê çaksazî bikin, lê hat redkirin.
Di dawiyê de Evîn Şêx Ehmed got ew di Nivîsgeha Peywendiyan de vê pêkanînê bi tundî şermezar dikin û bang li aliyên eleqedar kir ku destûrê bibin ku tîmên wan bi awayekî ewle derbas bibin, pirsgirêkê çareser bikin.