Diyarname
Siyadê xelatên sînemayê belav kirin. Du derhênerên kurd jî xelat girtin.

Komeleya Nivîskarên Sînemayê (Siyad) ku ev 43 sal in xelatên sînemayê belav kir, xelatên îsal ku li ser fîlmên par hatin dayîn jî belav kirin. Ji bo dayîna xelatan li TİM Show Center merasimeke xelatdayînê li dar ket. Di şevê de Serokê Siyadê Tunca Arslan axaftina destpêkê kir û diyar kir ku ji endamên wan ê herî ciwan û yê herî mezin, yê herî nû û yê herî kevn dilê wan ji bo eşqa sînemayê lêdide. Arslan bi gotina, "Bi hêviya ku emê di Tirkiyeyeke hê ronîtir, azadtir de bijîn, em silavên xwe yên germ ji bo hemû kesên di qadên cur bi cur ên sînemayê de dixebitin dişînin."

Paşê dest bi xelatdayînê hate kirin. Ji bo keda wan a sînemayê Xelata Rûmetê dan lîstikvan Tuncel Kurtiz, derhênerê Yusuf Kurçenli û muzîkar Cahit Berkay. Berkay dema xelata xwe girt got: "Li Qersê ew peykerê ku dê bê xirakirin heye, ez ji bo destên ku ew peyker çêkiriye vê xelatê digirim" û bi vî awayî rexne li Serokwezîr kir ku xwestibû ew peykerê Mehmet Aksoy yê li Qersê bê xirakirin.
Murat Utku ku li ser xebatkarên berxwedêr ên Tekelê belgefîlmek bi navê "Direnişçi" (Berxwedêr) kişandibû û Xelata Belgefîlmê Herî Serketî girt got: "Berxwedaneke wisa ya kedkaran tesîr li me kiribû. Sipas ji bo berxwedêrên Tekelê."

Di warê belgefîlm û kurtefîlman de çend derhênerên kurd jî bi berhemên xwe berendamên xelatgirtinê bûn. Ji wan Î. Serhat Karaaslan bi kurtefîlmê xwe "Bisqilêt" Xelata Kurtefîlman a Herî Serketî girt. Derhênerê kurd Cahit Çeçen jî Xelata Derhênerê Hêvî Dide ya Ahmet Uluçay girt.

Di şevê de fîlmê derhêner Reha Erdem "Kosmos" Xelata Fîlmê Herî Serketî, Derhênerê Herî Serketî jî di nav de 5 xelat girt û mora xwe li şevê da. Piştî "Kosmos", fîlmê derhêner Seren Yuce "Çogunluk" 4 xelat girtin.

Vaye xelatên ku di şevê de hatin belavkirin:

- Derhênerê Herî Serketî: Reha Erdem (Kosmos)
- Fîlmê Herî Serketî: Kosmos
- Senaryoya Mahmut Tali Ongoren a Herî Serketî: Seren Yuce (Çogunluk)
- Xelata Cahide Sonku ya Performansa Lîstikvana Herî Serketî: Sevinç Erbulak (Prensesin Uykusu)
- Lîstikvanê Herî Serketî: Barku Kuçukçaglayan (Çogunluk)
- Lîstikvana Duyemîn ya Herî Serketî: Nihal Koldaş (Çogunluk)
- Lîstikvanê Duyemîn yê Herî Serketî: Settar Tanrıogun.
- Dîmena Herî Serketî: Florent Herry (Kosmos)
- Muzîka Herî Serketî: Selim Demirdelen (Kavşak)
- Derhênerê Hunerê yê Herî Serketî: Omer Atay (Kosmos)
- Vesazkirina Herî Serketî: Reha Erdem (Kosmos)
- Belgefîlmê Herî Serketî: Direnişçi (Murat Utku)
- Kurtefîlmê Herî Serketî: Bisqilêt (Î. Serhat Karaaslan)
- Derhênerê Hêvî Dide ya Ahmet Uluçay: Cahit Çeçen
- Fîlmê Herî Serketî yê Biyanî yê 2010'an: "Des Weisse Band (Bandê Spî / Michael Henek)