STENBOL
Hunermendan, li hemberî TRT 6 û hin kanalên din ku bêyî mafê telîfa wan bidin berhemên wan diweşînin, daxuyanî da û diyar kirin ku ev weşan berhemên wan didizin. Li ser navê komê dîrektorê Kom Muzîkê Erdal Avci got ku di sala dawî de hezar berhemên wan bêyî ku mafê telîfê bê dayîn hatine dizîn û ew dê ji ber vê yekê gilî bikin.

Hunemremdên kurd li hemberî TRT 6 û hin kanalên taybet ên ku berhemên wan bêyî destûra wan bikar tînin nerazîbûn nîşan dan. Hunermendên kurd der barê mijarê de li duh li Otela Hîll a Taksîmê daxuyanî dan çapemeniyê. Li ser navê hunermendan dîrektorê Kom Muzîkê Erdal Avci bêhiqûqiya ku li holê ye anî ziman

Avci daxuyand ku wan nêzî saleke ye weşanên wan kanalan şopandine û tespît kirine ku bi awayeke pir cîdî binpêkirinên hiqûqî û mafan hene. Di encama xebatên wan de derketiye holê ku TRT 6 bi awayeke skandalî maf bin pê kiriye ku herê zêde divê TRT 6 li gorî Qanûna Berhemên Huner û Fikrî tevbigere.

Erdal Avci got ku di encama lêkolînên wan de derketiye holê ku nezî hezar binpêkirin tespît kirine. Di kanalên taybet de mehê 3-5 binpêkirin tespît kirine lê di TRT 6'ê de rojê 10 binpêkirin tespît kirine.

Dîrektorê Kom Muzîkê Avci diyar kir ku Wezîrê Dewletê Bulent Arinç jî ji bo TRT 6 zêde bê temaşekirin derketiye tura qanîkirina hunermendên kurd. Her wiha der barê van binpêkirinan de xwestine bi Wezîrê Çandê Ertugrul Gunay re hevdîtinê pêk bînin lê bersivek negirtine. Avci got ku ew ê li dijî vê yekê heta dawî ziman, ked û çanda kurdî biparêzin

Piştî daxuyaniyê parêzer Hanim Çelîk jî ev binpêkirinên ku tên kirin bi sînevîzyonê nîşan da û got ku ligel hişyariyên wan heke ev bêhiqûqî û binpêkirin bidomin dê serî li riyên hiqûqî yên netewî û navneteweyî bidin.