Diyarname
Dengbêj Seyîdxanê Boyaxçî ku bi salan e bi deng û klamên xwe cihekî girîng di nav dilê kurdan de ji xwe re çêkiribû îro wefat kir.

Seyithan Şimşek, bi navê xwe yê her kes dizane Seyîdxanê Boyaxçî di sala 1933'yan de li gundê Lexerî ya Erxeniya Amedê hatiye dinê. Di du saliya wî de diya wî, 4 saliyê de jî bavê wî dimire û sêwî dimîne. Di 15 saliya xwe de tê Amedê û dest bi boyaxçîtî dike. Demek di Şaredariya Bajêr de wekî xebatkarê paqijiyê dixebite. Lê tam bi temamî 25 salan boyaxçîtî dike loma bi navê Seyîdxanê Boyaxçî deng veda. Ji heft saliya xwe ve klaman dibêje.

Seyîdxanê Boyaxçî di dema karê xwe û heta niha de her klam digot. Herî zêde jî klaba "Têlî" û paşê klamên wekî "Seîdê Ehmed", "Keçika Qereçî", "Mihemed Seîd Axa", "Huso û Nazê", "Nabi Nabi", "Domam" û gelek din bi ser zimanê wî re gihan ber guh û dilên gelek kurdan.

Boyaxçî ku 87 salî bû, di nav Dengbêjên Amedê de cih digirt û gelek dihat hezkirin. Di albuma ku ji klamên Amedê pêk dihat û dengbêjên Amedê ew dixwendin de wî jî bi çend klaman cih girtibû. Ew dibêje "gelek kasetên min hene."

Boyaxçî ku ev demek bû nexweş bû îro wefat kir. Cenazeyê wî dê li Goristana Yenîkoya Amedê bê definkirin.

Bîranînek wî ligel Şakiro

Seyîdxanê Boyaxçî di bernameya "Bêndera Çandê" ya ku Şêxmûs Sefer amade dikir de qala bîranîneke xwe ligel Şakiro wisa dike: "Piştî min ev klama Seîdê Ehmed xwend, Xwedê rehma xwe lêke Şakiro ji lingên min mêze kir heta porê serê min go, 'Law cîf cîfa mêşê, deng dengê gamêşê ye'. Min got Şakir, go ha, mi go Îlham Xwedê daye min, go Sedeq. Go, 'Law tu ewqayî (qala bejnbiçûkiya wî dike) ev denga ji ku dertê?' Wê çaxê ez gênc bûm."

Cenaze hat definkirin

Cenazeyê dengbêj Seyîdxanê Boyaxçî piştî nîvro anîn Goristana Yenîkoya Baglara Amedê. Piştî wecîbeyên olî cenaze hate definkirin.  (Ev paragraf paşê li nûçeyê hat zêdekirin)