Diyarname
15 sal berê dest pê kirin û her şemî hatin ba hev. Îro careke din hate ba hev û 300 hefte li dû xwe hiştin. Lê hê jî xizmên wan li ku ne, çawa hatin windakirin ne diyar e.

Belê Dayikên Şemiyê dema 15 sal berê li ber Deriyê Lîseya Galatasaraya Stenbolê hatin ba hev tenê li dor 30 kesî bûn. Her ku çû, her hefte ku li dû xwe hiştin hejmara wan zêde bû, gihîşt sedan, carinan hezaran.
Wêneyên windayan, wêneyên xizmên wan di destê wan de û bêdeng rûniştin li ber deriyê lîseyê. Bang li rayedaran kirin, daxwaza dîtine windayên xwe kirin. Ji dêvla ku winda bêne dîtin, ji dêvla ku ew bigihîjin xizmên xwe, polîs gihîştin wan; ew dan ber copan, ji erdê re kaş kirin, girtin bin çavan...

Demekê wisa bû ku li cihên ew rûdiniştin, li ber deriyê Lîseya Galatasarayê polîs bi cih bûn, cihê rûniştinê ji wan re nema. Demek hat hê ew negihîştin ber derê bi destê wan girtin û ew bi dûr xistin, girtin bin çavan. Di rewşeke wisa de wan ji mecbûrî demekê navber da çalakiyên xwe, lê piştî salan dîsa dest bi çalakiya xwe kirin. Û di dawiyê de îro cara 300'emîn car hatin ba hev. BDP'yî, jina Hrant Dink Rakel Dink, derhêner Sirri Sureyya Onder, Prof. Dr. Gencay Gursoy, rojnameger Necmiye Alpay, karsaz Osman Kavala, endamê Meclisa Aştiyê Hakan Tahmaz, nivîskar Temel Demirer, parêzer Fethiye Çetin, parêzer Eren Keskin, danskar Zeynep Tanbay, endamên saziyên sivîl, nivîskar û xwendekar jî ji bo piştgiriyê li cem wan bû.

Ew careke din saetekê rûniştin, daxwaza windayên xwe kirin.