BEDLÎS
Şaredariya Tetwanê girtîgeha kevin xira kir û li şûna wê parka ku navê Ceylan Onkol lê kir çêkir.

Şaredariya Tetwanê ya Bedlîsê girtîgeha kevin xira kir û di cihê wê de parkek çêkir. Şaredarê navê Ceylan Onkola ku li Licê hate kuştin lê kir û park bi merasimekê vekir.

Şaredarê Tetwanê Abdullah Ok, Hevserokê Rêxistina BDP'ê ya Tetwanê Hayrettîn Çaçan, Serokê Şaxa KURDÎ-DER'ê Maruf Orenç û gelek kes tevlî vekirina parkê bûn.

Şaredar Ok, diyar kir ku divê li cihê girtîgehan park, fabrîqe û qadên kar bên çêkirin û wiha got: "Îro em li vir cihê girtîgehekî kevin parkê çêdikin. Hêviya me ew ku êdî li tu derî girtîgeh neyên çêkirin. Ji dêvla girtîgehan kargeh bêne çêkiri."

Ok diyar kir ku projeya wan a li her taxê parkek heye û wiha berdewam kir: "Hê em nehatin ser kar me soza em dê li her taxê parkekê û li her taxê qada lîstinê çêbikin dabû. Em îro wan sozan yek û bi yek tînin cih. Ez hevî dikim ku emê li hemû taxên xwe parkên baştir çêbikin."

Ok li ser parka Ceylan Onkol jî wisa got; "Parka îro em vekirina wê dikin, em ji bo ku navê Ceylan Onkola bi bombeyê hate qetilkirin ji bîr nekin e. Êdî em naxwazin zarok bimirin."

Piştî vekirina parkê Ok û Serokê Şaxa KURDÎ-DER'ê Maruf Orenç pirtûkên çîrokan ên bi kurdî dan zarokên ku hatin vekirina parkê.

Ji DÎHA'yê hatiye girtin