DiyarName.Com

"Parîsabad" hat!

Nivîskar Fawaz Husên piştî pirtûka xwe ya bi navê "Amîdabad" vê carê bi "Parîsabad"ê derket pêşberî xwendevanan.

Dîrok: 29/10/2010

Diyarname
Nivîskar Fawaz Husên piştî pirtûka xwe ya bi navê "Amîdabad" vê carê bi "Parîsabad"ê derket pêşberî xwendevanan. Pirtûka çîrokan "Parîsabad"a Husên ji Weşanên Avestayê derket.

Di Parîsabadê de, di van kurteçîrokan de ku mirov dikare wan wekî beşên romaneke hevgirtî bixwîne, Fawaz Husên li ser mijara derbideriyê, li Ewropayê û bi taybetî li ser Parîsê dinivîse.
“Di destexaniyê xwe de, li qata heftan, li bajarê Parîsê, bîranînên min wekî libên tizbiyek kehreban di destê deqandî yê kalemêrekî de didin dû hev. Li Porte des Lilasê, ez hem hespekî textînî me, hem jî ew lawikê ku lê siwar bûye. Ji bîst û pênc salan ve ku ez ji deşta Mêrdînê dûr ketime, ez bawer dikim ku hespê min bi çargavî dinyayê li bin guhê hev dixîne, lê ew bi rastî di cîhê xwe de dimîne û di defa sînga Amûdê de diçe xwarê. Ez bawer dikim ku ez li Parîsê me, li paytextê Fransayê me, lê ez hema erd û zeviyên gundê Kurdoyê dipîvim û xwe ji serê girê wî digindirînim. Erê ez li kêleka çemê Seinê dijîm, û ji do êvarê de pir diçelmisim, lê ez bi roj û şevan dikevim çemê zaroktiya xwe û ez di hembêza bavê xwe de ajne û sobahiyê dikim.”

Fawaz Husên kî ye?

Fawaz Husên li gundekî ji derdora Amûdê hatiye dinê. Ew li Amûdê mezin dibe û xwendina xwe ya seretayî, amadeyî û navîn lê dixwîne. Paşê, ew beşê edebiyata fransî li zanîngeha Helebê hildibijêre. Di sala 1978'an de, ew digihêje Parîsê û li Sorbonnê xwendina xwe ya bilind di sala 1988'an de diqedîne û dibe doktorê ziman û wêjeya fransî.
Fawaz Husên niha mamosteyê zimanê fransî ye li wezareta perwerdekirinê, li Şaredariya Parîsê û li Zanîngeha Sorbonnê. Ew endamê Rêxistina Nivîskarên Fransayê ye û hem bi fransî, hem bi kurdî dinivîse. Parîsabad berhema wî ya nehan e ku bi yekî ji van her du zimanan çap dibe.
Di Parîsabadê de, di van kurteçîrokan de ku mirov dikare wan wek beşên romaneke hevgirtî bixwîne, Fawaz Husên li ser mijara derbideriyê, li Ewropayê û bi taybetî li ser Parîsê, dinivîse.

Berhem û wergerên Fawaz Husên

- Siwarên Êşê. Kurteçîrok. Stockholm, Welat, 1994.
- Biyanî. Wergera L'Étranger, berhema Albert Camus. Stockholm, Nûdem, 1995.
- Mîrzayê Piçûk. Wergera Le Petit Prince, berhema Antoine de Saint-Exupéry. Stockholm, Nûdem, 1995.
- Le Fleuve (Çem), Parîs, weşanên Méréal, 1997, çapa duyem, weşanên Le Rocher/Le Serpent à Plumes/Motifs, 2006.
- Dîroka edebiyata fransî, sedsala hivdehan û hîjdehan. Antolojî. Stockholm, APEC, 1998.
- La Poursuite de l'ombre. Wergera Siya Evînê, romana Mehmed Uzun. Parîs, weşanên Phébus, 1999.
- Kurdên Haymanayê. Wergera gotara Georges Perrot. Stockholm, APEC, 2000.
- Chroniques boréales (Bûyernameyên bakurî), Parîs, weşanên L’Harmattan, 2000.
- Amîdabad. Kurteçîrok. Stenbol, Avesta, 2001.
- Meşa bi serhişkî û Agirê koçer (La marche têtue et Feu nomade). Helbestên Gérard Chaliand bi fransî û bi kurdî. Stenbol, Avesta 2005.
- Prof dans une ZEP ordinaire (Mamosteyek li berbajarê Parîsê), Parîs, weşanên Le Rocher /Le Serpent à Plumes, 2006.
- Les Sables de Mésopotamie (Xîza Mezopotamyayê), Parîs, weşanên Le Rocher, 2007.
- En direction du vent (Ber bi aliya weşîna bayî ve), Parîs, weşanên Non Lieu, 2010.

Parîsabad / Fawaz Husên / Çîrok / 104 rûpel