Diyarname
Heyeta BDP'ê û TUSÎAD'ê hevdîtinek pêk anî. Seroka TUSÎAD'ê: Divê miheqeq bendava hilbijartinê biguhere."

Heyeta BDP'ê ku ji Hevserokên BDP'ê Selahattin Demirtaş û Gultan Kişanak, Cîgirê Hevserokan Tuncer Bakirhan û Mebûsa BDP'ê ya Stenbolê Sebahat Tuncel pêk dihat îro çû serdana TUSÎAD’ê.

Seroka TUSÎAD'ê Umit Boyner, ji rêveberiya TUSÎAD'ê Haluk Dinçer, Tayfun Beyazit, Ali Kibar, Volkan Vural û Mehmet Ali Aydinlar pêşwazî li heyeta BDP'ê kir.

Boyner piştî hevdîtinê ji bo rojnamegeran axivî, da zanîn ku wan bi taybetî li ser zagoneke bingehîn a nû fikrên xwe an3ine ziman û ji bo ku bi BDP'yiyan re li ser vê nîqaş kirine sipasiyên xwe pêşkêşî BDP'yiyan kir.

Boyner ku got ewê di meha berfanbarê de biçin Amedê, ev tişt anîn ziman:
- Pirsgirêka kurd heta ku li meclisê baş bê temsîlkirin û axaftin wê bê çareserkirin. Ji bo vê yekê divê miheqeq bendava hilbijartinê bê guhratin.

- Li Tirkiyeyê kêmasiya demokrasî heye. Ji bo ev ji holê rabe rêya herî baş li Tirkiyeyê zagoneke bingehîn a nû ku bi lihevkirineke mezin bê çêkirin lazim e. Sala pêşiya me hilbijartin heye. Berî vê em dixwazin nîqaşên zagona bingehîn bidin dest pê kirin, ji bo em bibin parçeyeke vê yekê jî peywireke cidî dikeve ser milê me.

- Me îro fikrên xwe yên li ser zagona bingehîn bi BDP'yiyan re jî par ve kir.

- Di meha berfanbarê de di xebata digel TURKONFED'ê ya li herêmê de emê herin serdana Amedê.

- Sala pêşiya me 40'emîn salvegera TUSÎAD'ê ye. Di vê çarçoveyê de emê li Anatoliyê hin çalakiyan li dar bixin. Wekî Amedê, li gelek bajarên Tirkiyeyê emê ev çalakiyên 40'emîn salê li dar bixin.

- Tiştê girîng ew e ku hemwelatiyên Tirkiyeyê nasnameya wan a etnîkî, baweriya wan çi dibe bila bibe bibin hemwelatiyên wekî hev û wisa bijîn.

Hevserokê BDP'ê Demirtaş jî ji bo rojnamegeran da zanîn ku keda TUSÎAD'ê girîng e û da zanîn ku wan li ser zagona bingehîn axivîne. Demirtaş wisa got: "TUSÎAD'ê saziyeke sivîl e ku di vî warî de xwedî şarezayiyê ye. Di demên borî de xebatên girîng kiriye. Di dema çêkirina zagoneke bingehîn a nû de keda saziyên wekî TUSÎAD'ê helbet wê girîng be."