Rizoyê Xerzî 
 
Di van salên dawî de ji gelek hêlan ve saziyên kurdan giraniya xwe dane ser weşana çîrokên gelêrî ku piraniya wan jî bi navê çîrokên zarokan derdikevin. 
 
Di van salên dawî de ji gelek hêlan ve saziyên kurdan giraniya xwe dane ser weşana çîrokên gelêrî ku piraniya wan jî bi navê çîrokên zarokan derdikevin. Lê mixabin dema mirov bala xwe dide naveroka van çîrokan mirov dibîne ku talûkeyeke mezin di naveroka xwe de dihewînin. Naveroka gelek ji wan çîrokên ku qehremanê wan hûtê şeş serî û gurên harin bandoreke neyênî li ser psîkolojiya zarokan dikin û li şûna di ber van çîrokan re di xewve herin, xew li wan diherime û xewnên ecêb dibînin.
Çi hişt ku haya min ji vê mijarê çê bibe, bi rastî heta niha min nizanibû û ev yek ferq nekiribû. Lê beriya çend rojan keça min a 4 salî bi qêrînekê ji xew rabû ku em jî bi xwe re ji xew veceniqandin û ziravê me jî bi xwe re qetand. Dema şiyar bûn û min ew himbêz kir û hinekî li sedemê vê tirsa wê pirsî, min nas kir û sedema tirsa wê çîroka Şengê û Pengê ye.
Viyan xewna xwe ya bi tirs wiha ji min re got: Tu, birayê min Ronî û bizin li wê odeya me ya din bûn, gur hat lingê Ronî gez kir û piştre êrîşê min kir. Dema ku viyan wiha got min nas kir ku mesele çîroka Şengê û Pengê ye, ji ber di wê çîrokê de Gur, Karikên bizinê yên bi navê Şengê û Pengê dixwe. Lê sedem ne tenê ev çîroke. Ev çîrok min wê rojê jê re negotibû, min di demên berê ên cuda de jê re gotibû. Lê sedema din ew bû ku ji ber wê şîv nexwar min jî wê şevê jê re gotibû kî şîvê nexwe ez bi wan re nalîzim, Ronî şîv xwar ezê pê re bilîzim. Ji xwe zarokên di ser serê hev re ji hev acizin bi taybetî yê mezin ji biçûkê xwe, ji ber ku ew tên cihê wan digirin û têkildariya bi wan re ji alî malbatê ve kêm dibe.
Bêguman ez poşman bûm ku min ew çîrok jê re gotiye û ez mecbûr bûm ku carekê din li ser daxwaza wê jê re wê çîrokê bêjim lê êdî min hin beş bi baldarî gotin û min beşa ku gur Şengê û Pengê dixwe wekî wan direvîne got. Viyan li wir hinekî îtîraz kir lê min got te şaş fêm kiribû, gur wan ne xistibû zikê xwe wan dabû ber zikê xwe ango ew hembêzkiribûn û revandibûn lê dayika wan ew ji destê gur rizgar kirin.
Ev ji bo min bû wek dersekê êdî dema ku bixwazim ji zarokên xwe re çîrokekê bêjim divê haya min ji naveroka wê hebe da ku nebe sedemê tirs û xewherimandinê.
Bi her halî dema ku we ji zarokên xwe re çîrok xwendin bi balkêşî wan çîrokan hilbijêrin û hay ji zarokên xwe hebin. Bi taybetî jî ev sazî û rêxistinên me yên ku ew karê çapkirina çîrokan dane ber xwe divê bi baldarî wan çîrokan hilbijêrin û çîrokên ku ne gor zarokan be bi navê çîrokên zarokan neyên weşandin.
 
rizoxerzi@gmail.com 

Ji Azadiya Welat hatiye girtin