Cemil Oguz

Derhênerê kurd Rodî Yuzbaşi bi belgefîlmê xwe "Miraz" rêwîtiya xwe ya festîvala didomîne. "Miraz" vê payîzê wê beşdarî çend festîvalên di qada navneteweyî de bibe.

Derhêner Rodî Yuzsayi di sala 1979'an de li Agirî hatiye dinê. Yuzbaşi Beşa Radyo TV û Sînema ya Fakulteya Ragihandinê a Zanîngeha Ataturk xwendiye. Yuzbaşi, ku perwerdehiya lîsansa xwe ya bilind di Beşa TV Sînema ya Enstîtuya Hunerên Bedew a Marmarayê de didomîne heta niha bi fotografkêşiyê re eleqedar bû û li ser vê li gelek cihan semîner pêşkêş kiriye.
Ew, di van salên dawî de bi belgefîlmên xwe li qada sînemayê rêwîtiya xwe didomîne.

Xelakên ku Yuzbaşi girtin

Yuzbaşi, di 2007'an de belgefîlmê bi navê "Yêzîdî" kişand û di sala 2008'an de jî belgefîlmekî bi navê "Mezra Êzîdiyan" kişand. Ev belgefîlmê wî li Enqere (Xelata Belgefîlmê Herî Serketî yê Duyemîn), li Stenbol (Festîvala Fîlmên Bajêr Xelata Herî Serketî, Belgefîlmê Herî Serketî di Pêşbaziya Belgefîlman a Zanîngeha Bahçeşehirê de) û li hin bajarên din hat nîşandayîn û xelat girt.
Yuzbaşi îsal jî bi belgefîlmê xwe "Miraz" derket pêşberî temaşevanan. Miraz ku 58 deqîqe ye li ser çîroka xortekî kurd ê ku dike bi rêya qaçaxiyê here Fransayê ye. Belgefîlm bi vê çîrokê re jiyana wan a li gund, têkiliya di nav kurdên hê li gundên xwe ne û yên çûne Fransayê de nîşan dide. Xwezaya gundên kurdan, nîşandayîna tenêtiya dê û bavên ku li gund mane aliyên serketî yê belgefîlm in.
Belgefîlmê ku îsal yekem car di Festîvalê Fîlman a Navneteweyî ya Stenbolê de hat nîşandayîn, dûre li Enqereyê beşdarî festîvalê bû, paşê jî beşdarî Pêşbaziya Belgefîlman a TRT'ê bû û Xelata Duyemîniyê bi dest xist. Ji ber vê yekê jî rayedarên TRT'ê belgefîlm girtine bernameya nav xwe û di mehên pêşiya me de wê di televîzyonê de bê nîşandayîn.

"Miraz" piştî van beşdarî Doc-Festa Kosovayê bû, hefteya borî jî li 
Festîvala Belgefîlman a Navneteweyî ya Safrana Zêrîn (li Karabukê) hat nîşandayîn û di kategoriya belgefîlmên profesyonel de bû yekemîn.

Ji devê çîrokbêjeke "Maya" û herêmeke balkêş

Derhêner Yuzbaşi niha jî li ser belgefîlmê xwe "Maya" xebata xwe didomîne. "Maya" ku kişandina wî temam bûye niha di asta vesazkirinê de ye.
Li Serhedê golek heye ku li cihek bilind e; jêre gola masiyan jî tê gotin. Û li nava golê giravekî heye. Li vê derê zivistanê gol cemed digire. Ji ber ku mirov naçin wê giravê, girav tije teyr û tilûr in. Jiyana wê derê, çar demsal xwezaya wir, têkiliya xweza û mirovan bûye çîroka belgefîlmê "Maya". Li cihê ku lê gelek dengbêj û çîrokbêj hene de Yuzbaşi bi vegotina çîrokek ji devê pîrekê dest bi belgefîlm dike û wê derê di belgefîlmê xwe yê nû de pêşkêş dike. Belgefîlm, sala pêşiya me wê beşdarî festîvalan bibe.

Belgefîlmê Yuzbaşî "Miraz" di rojên pêş me de wê li van festîvalan bê nîşandayîn:
- Festîvala Porteqala Zêrîn a Antalyayê (Tirkiye), 9-14 kewçêr 2010.
- Doc-Fest a Sheffld (Îngilistanê), 4-7 sermawez 2010.
- Festîvala Cinema Verite (Tehran, Îran), 8-12 sermawez 2010
- 18'emîn Festîvala Fîlman a Plus Camerimage (Polonya), 27 sermawez-4 berfanbar 2010