Diyarname

Bi navê "Xebatên Rewşenbîriya Kurdî li Bakur" pirtûkek derket û notên sedsalekê yên van xebata pêşkêş dike.

Pirtûka Miraz Ronî bi navê "Xebatên Rewşenbîriya Kurdî li Bakur" (1900-2000) ji aliyê Enstîtuya Kurdî ya Stenbolê ve hat weşandin pirtûk qala xebat, sazî û weşanên li ser kurdî yên di sedsala 20'an de dike. Di pirtûkê de bi kurtahî agahiyên di vî warî de hatine pêşkêş kirin. 

Ronî li ser xebatê gotiye "Xebatên rewşenbîriya kurdî di gel ku ji serê sedsala 20'an ve dest pê kiribin jî lê belê hê jî ne xwedan zemîneke normal e û hê jî neketiye ser rêgeha xwe ya resen" û ev yek lê zêde kiriye: "Ev jî bûye sedem ku hê jî nasnameyeke temam ji bo ziman, huner û edebiyata kurdî çênebe. Ji ber vê yekê jî pêwîstî pê heye ku digel sedem û encam^ne wê ev rewş bê lêkolînkirin û ronîkirin." Ev xebat jî di vê çarçoveyê de hatiye amadekirin.

Di vê xebatê de bi taybetî li ser serdemên 1970, 80 û heta salên 2000'î hatiye sekinîn.

Pirtûk ji sê beşan pêk tê. Di beşa yekemîn de li ser mijarên wekî erdnîgariya kurdî, zimanê kurdî,. tevger û saziyên kurdî, di beşa duyem de li ser rewşa xebatên rewşenbîrî û di beşa sêyem de jî li ser kovar û rojnameyên ku derketine hatiye sekinîn.

Agahî bi kurtahî hatine pêşkêş kirin. Dikaribûn kûrtir, zelaltir agahî bêne pêşkêş kirin. Mînka sala derketina weşanan hatiye dayîn lê di wê salê de kîjan mehê yan rojê derketiye kêm maye. Ligel her tiştî pirtûkek ku gelek agahiyên li ser rewşenbîriya kurdî pêşkêş dike li ber destên xwendevanan e.

- Xebatên Rewşenbîriya Kurdî / Miraz Ronî / Weşanên Enstîtuya Kurdî ya Stenbolê / 2018 / 142 rûpel