Diyarname

Romaneke nû li pirtûkxaneya kurdî zêde bû: "Gurzo". Gurzo romana yekemîn a nivîskar Egît Yazar e û ji Weşanên Dara derketiye.

Egît Yazar ku ji nav karê rojnamegerî tê ji zû de ye di nav jiyana bi kurdî de ye lê heta niha pirtûk dernexistibû. Niha bi yekem pirtûka xwe ku romenek e ket nava qada nivîskariyê. Romana wî "Gurzo" wekî yekem romana wî û yekem pirtûka wî derket pêşberî xwendevanan. Yazar romama xwe bi ser kûçikek bi navê "Gurzo" re pêş ve biriye. Nivîskar Fêrgîn Melîk Aykoç ku pirtûk xwendiye li ser wisa nivîsandiye, "Ev roman gelek taybet e. Lewra kareterê sereke yê romanê ajalek e. Di jiyan û tevgera vî karekterî de, ew êşa sotin û wêrankirina gund û xwezayê, ew êş û koteka bêwijdan pir baş li ber çavan hatiye raxistin; ligel vê aliyê xwerû, vegotina wê jî gelek taybet e, herikbar e, xwîner dikişîne û dibe."

Niha Fûara Pirtûka a Amedê li dar e û yên bixwazin dikarin "Gurzo" li fûarê ji Weşanên Dara peyda bikin.

Agît Yazar kî ye?

Agît Yazar ji Mêrdînê ye, di sala 1973'yan de hatiye dinê, dibistan nexwendiye, di zarokatiya xwe de dema li ber berxan bûye pênûseke erdê dîtiye, bi vê li ser naylonê kulavê xwe nivîsandiye û bi vî awayî hînê nivîsandinê bûye. Di salên 90'an de li Azadayi Welat dest bi kar dike û piştî demek dibe nûnerê rojnameyê yê Çûkûrovayê. Li wê derê nivîsa xwe pêş dixe, gelek nûçeyên wî di rojnameyê de derdikevin.

Di pêşbaziya Newroza 2002'yan de çîroka wî "Kevoka Hezarbaskî" xelata yekemînî, di pêşbaziya Huseyîn Çelebî de (2008) jî çîroka wî Teyrikên Yezdan xelata sêyemînî girtiye.

Gurzo yekemîn pirtûka wî ye.

- Gurzo / Egît Yazar / Weşanên Dara / Roman / 2019 / 116 rûpel