Diyarname

Nivîskar Helîm Yûsiv bi romaneke nû pêşberî xwendevanên xwe ye. Romana bi navê "Firîna Bi Baskên Şikestî" ku ji Weşanên Peywendê derket yekem car li Fûara Pirtûkan a Amedê tê belavkirin.

Weşanên Peywendê par romana Helîm Yûsiv a bi navê "Wehşê di Hundirê Min de" derxistibû û roman gelek hatibû belavkirin. Niha romanek nû weşand: "Firîna Bi Baskên Şikeştî". Nivîskarê malpera me Yûsiv vê carê di romanê de berê xwe dide bajarê dilê kurdan Kobanî. Hadî Kino kamîraman û derhênereke ji Kobanî ye, difikire ku ew bi alîkariya hevalê xwe yê senaryonivîs Burhan Emîn filmekî li ser dengbêjekî xort ku xwedikuje çêbikin. Lê dema bajarê wan ji hêla Daişiyên xwediyên alên reş ve tê dorpêçkirin û çavê dinyayê hemî dizîvirin ber bi wî bajarê biçûçik ve, yekser mijara projeya xwe ya fîlm diguherînin û dest bi kişandina filmekî li ser bûyerên rasteqîne yên bajarê xwe dikin. Lê çeteyên alên reş sivîlan dikujin. Ma mirî dikarin fîlm bikişînin?

Roman ji sê beşên bingehîn pêk tê, berê xwendevanan dide Kobaniya ku êdî dilê her kurdî ye. Çîroka karakterên wê derê mijara sereke ya romanê ye.

Roman nû derket û di rojên dawî yên Fûara Pirtûkan a Amedê de li standa Weşanên Peywendê li benda xwendevanên xwe ye.

Helîm Yûsiv kî ye?

Nivîskar Helîm Yûsiv di sala 1967'an de li Amûdê hatiye dinê. Li Zanîngeha Helebê Fakulteya Hiqûqê qedandiye û ji sala 2000'î ve li Almanyayê dijî. Malpera me Diyarname jî têde bi dehan gotarên wî di malper, kovar û rojnameyên kurdî û erebî de hatine weşandin. Ew berhemên xwe bi kurdî dinivîse û ev berhemên wî heta niha li zimanên tirkî, erebî, farisî, îngilîzî û almanî hatine wergerandin. Dîsa heta niha ji çîrokên wî lîstikên şanoyên yên wekî "Komara Dînan", "Bidarvekirina Pozekî" û Sol û Serî" hatine amadekirin û lîstin.

Berhemên wî yên çapkirî ev in:

- Mêrê Avis (çîrok. 1991)

- Jinên Qatên Bilind (çîrok, 1995)

- Mirî Ranazin (çîrok, 1996)

- Sobarto (roman, 1999)

- Memê bê Zîn (çîrok, 2003)

- Tirsa Bê diran (roman, 2006)

- Gava ku Masî tî Dibin (roman, 2008)

- Romana Kurdî (lêkolîn, 2011)

- Auslander Beg (çîrok, 2011)

- 99 Morîkên Belavbûyî (roman, 2015)

- Wehşê Di Hundirê Min De (roman, 2018)

- Firîna Bi Baskên Şikestî (Roman, 2019)

- Firîna Bi Baskên Şikestî / Helîm Yûsiv / Roman / 2019 / 128 rûpel