Zekî Ozmen

Di rêzefîlmê "Skylines" ê Netflixê yê şeva din hat weşandin de hem karekterên kurd hene û hem jî derhênera 3 beşên dawiyê kurd e. Naveroka rêzefîlmî li ser têkiliya hip hop, pere û krîmînaliyê ye. 

Produserê muzîkê Jinn (Edin Hasanovic) ku nava rojê di hotelekî de dixebite, bi şev jî ji hevalê xwe yê herî nêzîk Tonic re stranên hip hopê çêdike. Piştî şîrketa muzîka Skyline bi şertê ku Jinn dev ji hevkariya Tonic berde, ew ê peymaneke ji bo produseriyê pê re çêbike, çîroka tevlihev a bi nav û dengbûnê, pere û krîmînaliyê dest pê dike.

Rêzefîlm li Frankfurtê hatiye kişandin, ji ber ev bajer wekî navendeke ku gelek hip hopvan jê xuliqîne tê naskirin. Skylines rêzefîlmê çaremîn ê almanî yê di Netflixê de ye.

Hem derhêreke rêzefîlmî û hem jî gelek lîstikvan û karekterên rêzefîlmî kurd in. Soleen Yusef ku bi eslê xwe ji Duhokê ye, derhêneriya her sê beşên dawiyê yên rêzefîlmî kiriye û derhêrê her sê beşên destpêkê Max Elenwein bû. Muzîka jenerîkê ya rêzefîlmî jî hip hopvanê alman ê esilkurd Haftbefehl e. Her wiha hip hopvanê navdar ê alman ê esilkurd Azad jî di rêzefîlmî de dilîze. Artîstê kurd Erdal Yidiz jî di rêzefîlm de xwedî karekterê Ardan e. Ji bilî wan, artîsta swîsrî Carol Schuler jî karekterê hip hopvaneke kurd a xirab a bi navê Zîlan dilîze.

Piştî rêzefîlm hat weşandin, hema bêje tu dezgehên ragihandinê yên mezin ên alman neman ku nivîs derbarê wê de neweşandin. Kovara Stern wiha danasîna rêzefîlmî kir: "Ev rêzefîlm ji rasteqîniyê pêk tê. Çîrokeke bi kelecanî ye, artîst gelek baş in û soundtrack têkûz in. Ev hemû bi hev re Skylinesê wisa dikin ku hesta ev rêzefîlm li Almanyayê hatibe çêkirin bi mirov re peyda nebe." 

Derhênera rêzefîlmî Soleen Yusef ku derhênereke gelekî ciwan e berî niha di Rûdawê de behsa derhêneriya xwe ya vî rêzefîlmî û projeyên xwe yên dahatuyê jî kiribû. Yusef diyar kiribû ku wê hewl daye hestên xwe yên kurdî tevlî rêzefîlmî bike. Wê her wiha destnîşan kiribû ku ew niha li ser rêzefîlman kar dike, ji bo tecrubeyê ji xwe re çêbike û stîla xwe pêş bixe.

Derbarê projeyên xwe yên dahatuyê de jî ew wiha axivî bû: “Bi senaryoya fîlmekî derbarê keçeke kurd a biçûk a ji futbolê hez dike ve mijûl im û ji bo wê min foneke alîkariyê jî standiye. Fîlm wê li Berlînê were kişandin. Lê armanca min a herî mezin ew e vegerim Kurdistanê û fîlmekî kurdî çêbikim. Ez dixwazim sînemaya kurdî pêş bixim. Dixwazim bibim parçeyek di guherîna sînemaya kurdî de."

Her şeş beşên rêzefîlmê Skylines ji doh ve li ser Netflixê hatine belavkirin û aboneyên wê dikarin yekser li pey hev li hemû beşan temaşe bikin.

Derhêner Soleen Yusef ji Duhokê ye, li Almanyayê dijî û dibêje ew dixwaze di guherîna sînemaya kurdî de bibe parçeyek wê guherînê.