Diyarname
Koma navdar U2 li Stenbolê konsera xwe de. Di konserê de, endamê komê Bono got; "Em ji bo bîranîna Fehmi Tosun"* dixwînin û dest bi strana xwe "Mothers of Disappear"** xwend.

Koma U2 di sala 1976'an de li Îrlandayê hatiye avakirin. Endamên komê dema di lîseyê de dixwendin hatin ba hev. Li temamê dinyayê firotina albumên wan gihîştiye 140 mîlyon hebî. Wan heta niha  22 xelatên Grammy girtine û bi vê yekê rekor şikandine.

Endamê komê û solîst Bono li dinyayê tekane kes e ku bûye berendamê xelata Oscar, Grammy, Golden Globe (Giloka Zêrîn) û xelata Nobelê.
Wan heta niha di gelek çalakiyên alîkariyê de cih girtine û niha Bono di nav xebata ji bo Afrîkayê, di nav çalakiyên li hemberî HIV/AIDS, dîsa di nav xebata ji bo ji holêrakirina feqîrî û germa globalê de jî cih digire.

Konsera U2 li Stana Olîmpiyatê ya Atatuk êvarê dest pê kir. Di konsera ku digel baranê bi ser 60 hezar kesî beşdar bû de Zulfu Livaneli jî li ser daxwaza komê derket ser dikê û tevî komê duet kir.

Xebata ji bo konserê bi mehan berê hatibû dest pê kirin û xebata amadehiya nav stadê jî bi rojan berê dest pê kiribû. Di dika ku navê "The Claw" (Pence) lê kiribûn, di konserê de 360 derece li dora xwe geriya û coşek mezin pêşkêşî temaşevanên U2 kir.
Her wiha bi pergala vîdeo jî panelên LED jî bala temaşevanan kişand ser konserê.

Komê di 2 saet û nîv de 25 stran pêşkêş kirin.

Bono dema derket ser dikê got; "Ji bo sebra we sipas. Hatina me ya Stenbolê gelek dem girt, lê em hatin. Li vî welatî çi diqewime, tiştên li vî welatî dibin hemû dinyayê eleqedar dikin." Dûre Bono ji bo muzakerekarê ji bo Yekîtiya Ewropayê navê Egemen Bagiş ê AKP'ê anî ziman lê temaşevanan ew protesto kir. Li ser vê wisa got: "Temal, ezê qala siyasetê nekim lê ez dikarim qala pirê we bikim. Pir mikemel e, ne tenê di navbera Ewropa û Asyayê de ye, di heman demê de di navbera ol û laîkî de, di navbera paşeroj û pêşerojê de pirek e. Rêya ku Ewropa têre here ev e."

U2 berî konserê ji bo xwendina straneke Zulfu Lîvanelî vexwendibû û Lîvanelî di konserê de "Yigidim Aslanim" xwend. Her wiha Livanelî tevî U2 strana ‘Mothers of the dissappeared’ ku wan ji bo bîranîna Fehmi Tosun xwend, bi hev re xwendin.

* Fehmi Tosun ku ji gundê Licok a Licêya Amedê ye di sala 1995'an de li Avcilara Stenbolê nava rojê ji aliyê hêzên tarî ve hat revandin û heta îro tu agahî jê nehate girtin. U2 di albuma xwe ya bi navê "Pop" ku di sala 1997'an de derxist têde Fehmi Tosun bibîr anî bû û gotibû 'wî ji bîr nekin'.

**Strana "Mothers of the Disappeared" (Dayikên Windayan) Di destpêka salên 1980'ê de, di serdana xwe ya li El Salvadorê de dema bi dayikên windayan re hatibû cem hev nivîsandibû. (Li El Salvadorê di navbera eniya çep û hikumeta ku DYA piştgirî dida de şerê navxweyî pêk hatibû. Di vî şerî de gelek winda çêbûbûn). Hin ji gotnên stranê: Di nav bayê de em kenê wan dibînin / Di nav baranê de em hêstirên wan dibînin / Em lêdana dilê wan dibihîzin.