ERDOGAN ALTAN

Piştî ku li Heskîfê ji jor tehtek ket û kesek jiyana xwe ji dest da, çûn û hatina Keleha Heskîf û çardaxên li qerexa Dîcleyê hat qedexekirin. Her wiha kilît li deriyê esnafên li wir hate dan. Esnafên Heskîfê jî bertek nîşanê vê rewşê didin û vê yekê wekî pêvajoya destpêka bêînsankirina Heskîfê dinirxînin. Berdevka Hewildana Jiyankirina Heskîfê ya Êlihê Îpek Taşli jî, anî ziman ku qedexekirina deverê destpêka kuştina turizmê ya Êlihê ye.

Nîqaşên der barê dê Heskîf di bin Bendava Ilisuyê de bimîne didomin, lê di 13'ê tîrmehê de ji ber ku ji ser tehtê hemberî Keleha Heskîfê parçeyek kevir ketibû û mirovekî 75 salî jiyana xwe ji dest dabû nîqaş veguherî tiştek din. Walîtiya Êlihê û Weqfa Paraztina Cihên Dîrokî ya Amedê ji 11 esnafên di bin Keleha Heskîf û çardaxên li qerexa Dîcleyê dimînin re, fermanameyek şandin û ew der girtin. Çûn û hatina van deveran ji hêla polîsan ve bi barîkatan ve hate girtin. Her wiha ev devera ku tûrîst eleqeyeke mezin nîşan didin jî ji bo çûn û hatinê hat qedexekirin. Esnafên Heskîfê jî bertek nîşanê vê rewşê dan û diyar kirin ku berê jî gelek caran teht ketibûn lê biryarek wiha radîkal nehatibû girtin. Esnafên ku dikanên wan hatine girtin ev yek wekî destpêka koçberiya mezin nirxandin.

'Qedexekirina vir dînîtî ye'

Turîstên biyanî yên ku dîtin çûna kelehê û çardaxan ji hêla polîsan ve hatiye qedexekirin û rê ji trafîkê re hatiye girtin, heyirî man. Turîstê bi navê Derek ê ji Holanda li ser pêşniyara hevalên xwe hatiye Heskîfê, dema ji hêla polîsan ve paş ve hate vegerandin, gelek şaş bû. Derek, diyar kir ku ne tenê Heskîf, dema ew bi wesayîtê kete ser riya Heskîfê bedewiya vir bandoreke mezin li ser wî kiriye. Derek, anî ziman ku ew fêm nake, lewre hê jî heke bi israr dixwazin bendavê çêbikin, wê demê rewşeke enteresan heye.

'Qedexekirina vir mirina me ye'

Esnafên ku kilît li deriyê dikanên wan hatiye dan, bertek nîşan dan û bi rayedarên qeymakam, walîtî û miduriyeta Turîzmê ya Bajêr re hevdîtin pêk anîn. Esnafan, diyar kirin ku heke îmkana pêşîlêgirtinê hebû, berê de jî teht ketibûn çima pêşî lê nehatiye girtin. Piştî hevdîtinê, rayedaran biryar daye ku esnaf û çardakvanên li qerexa Dîcle yê ne, dê bikişînin aliyê din ê avê. Ji esnafan Nîhat Metem, diyar kir ku qedexekirina çûna Kelehê û çardaxan kuştina debara mirovên Heskîfê ye. Metem, ev tişt gotin: "Belê em jî dibêjin xetere heye, mirina kesekî em xemgîn kirin. Lê em dibêjin berê de jî teht ketibûn, lê biryarek wiha radîkal nehatibû girtin. Niha dibêjin em dê restore bikin, pişt re hûnê dîsa karibin bikevin vir. Madem îmkana pêşîlêgirtinê hebû, çima we berê de nekir. Qedexekirina çûna vir, mirina me ye."

'Bi vê biryarê re dixwazin Heskîfê ji mirovan îzole bikin'

Berdevka Hewildana Jiyankirina Heskîfê ya Êlihê Îpek Taşli jî, diyar kir ku bi bûyera ketina tehtê re, çûna riya kelehê û çardaxên ku turîst herî zêde diçin wir, hatiye qedexekirin. Taşli, da zanîn ku ev yek di serê mirovan de gumanê çêdike. Taşli, destnîşan kir ku lewre rayedaran dizanibû ew der hesas e û gelek caran ji bo pêşîlêgirtinê serlêdan hatine kirin. Taşli, ragihand ku rayedaran tiştek nekir û wiha got: "Bi vê biryara radîkal dixwazin ku Heskîfê ji mirovan îzole bikin. Me lêkolînek kir. Em dê rojên pêş de encama lêkolîna heyeta xwe ji raya giştî re aşkera bikin. Lê yekane çareserî ne îzolekirina mirovan a ji Heskîfê ye. Bila ev jî baş bê zanîn."