Amed
Koordînatorê Weşana Giştî ya Rojnameya Azadiya Welat Tayîp Temel, ragihand ku wê sibê Xwediyê Îmtiyazê û Midûrê Karên Nivîsê yê rojnameyê Vedat Kurşun li 6'emîn Dadgeha Cezayê Giran a Amedê bidome û bang li hemû derdorên bihîstyar kir ku piştgiriyê bidin Kurşun û rojnameyê.

Xwediyê Îmtiyazê û Midûrê Karên Nivîsê yê rojnameyê Vedat Kurşun, di 5'ê sibata 2008'an de ji aliyê 6'emîn Dadgeha Cezayê Giran a Amedê ve bi hinceta "bi rêya nûçeyê propagandaya rêxistinê kiriye", "Bi rêya çapemeniyê li ser navê rêxistinê fermana çalakiyan daye" hatibû girtin. Kurşun sibê cara 3'yemîn derdikeve pêşberî dadger. Koordînatorê Weşana Giştî ya Rojnameya Azadiya Welat Tayîp Temel, têkildarî mijarê daxuyaniyek nivîskî da. Temel, diyar kir ku Kurşun bi tevî parêzerê xwe, ji bo dayîna îfade çûye dadgehê, li vir bêyî ku hincetek hiqûqî bê nîşandan, hatiye girtin. Temel, bibîr xist ku danişîna yekemîn bi beşdariya 5 parêzeran, her wiha parlementerên ku ji bo piştevaniya netewî û navnetewî, şaredaran, rêxistinên civakî yên sivîl û parazvanên çapemeniya azad pêk hatiye. Temel, wiha got: "Lê dadgehê dîsa jî, bêyî ku hincetek têr nîşan bide, danişîn taloqî 25'ê adara 2008'an kir û hevalê me berneda."

'Doz ji bo bêdengkirina fîîlî ya rojnameyê ye'

Temel, bibîr xist ku Kurşun ev nêzî 2 meh in di girtîgehê de ye û wiha dom kir: "Navnîşan û xebata li ser bingeha zagonî ya Midûrê Karên Nivîsê yê rojnameyek, li ber çav e, lê dîsa jî biryara girtinê tê dayîn. Hikûmet ji aliyek ve bi derketina weşanên kurdî pesnê xwe dide, ji aliyê din ve dadgeh bêyî ku biryara girtinê bide, hewl dide dengê Azadiya Welat bi awayê fîîlî bibire. Jixwe ji ber ku Kurşun girtî ye, li ber domandina weşanê astengiyên pir cidî pêk tên. Dadgehê, ji 30'î zêdetir dozên der barê Kurşun de, kiriye yek û bêhiqûqiyek mezin derxistiye holê. Bi vî awayî, îdîaya xwe ya 'bi rêya nûçeyê propagandaya rêxistinê kiriye', 'Bi rêya çapemeniyê li ser navê rêxistinê fermana çalakiyan daye', bi zanebûn didomîne."

40 doz hatin vekirin

Temel, da zanîn ku nêzî 40 doz li Kurşun hatine vekirin û hejmara lêpirsînên ku hatine destpêkirin jî nayê jimartin. Temel, wiha got: "Lê 6'emîn Dadgeha Cezayê Giran, hemû dosyayan dike yek, hejmara dosyayên ku hatine vekirin jî li berçav digre û bi îdîaya 'endamê rêxistinê ye' didarizîne. Di danişîna dawî de dozgeriyê raya xwe da û xwest ku Kurşun hem ji endametiyê, hem jî ji ber propagandaya rêxistinê ya di her hejmarek de cuda cuda propagandaya rêxistinê hatiye kirin, were cezakirin. Darizandin didome. ji ber van hemû sedeman, em bang li hemû saziyên çapemeniyê yên bihîstyar, hemû derdorên ku azadiya çapemenî û ramanê dixwazin, nûnerên saziyên civakî yên sivîl, şaredar, parlementer, hiqûqnas û pêşengên civakê dikin ku bi Kurşun û bi rojnameya me re di nav piştevaniyê de bin."

Danişîna Kurşun, roja 15'ê mehê saet di 09.00'an de li 6'emîn Dadgeha Cezayê Giran a Amedê pêk bê.

Ji DÎHA'yê hatiye girtin