Diyarname
Li ser navê Şa Performansê Tuncay Ozel nameyek eşkere şandiye, em bêyî destê xwe bidin vê nameyê diweşînin:
***
"Nameyek ji Şa Performansê!
Ez Tuncay Ozel.
Me bi çend hevalan re di Hezîrana (Pûşpera) 2018'an de li Stenbolê bi piştgiriya karzasekî Şa Performansê ava kir û dest bi xebatên hunerî kir. Bi rastî ji berê ve; me şanoya serbixwe çêkiribû û me zor û zehmetiyên şanoya serbixwe zanibû.
Di nav salekê de me 4 lîstik (yek ji wan ji bo zarokan) derxistin û me lîstikên xwe gihandin Kurdistanê jî. Tenê qaîdeyek me hebû; divê lîstikên me bi kurdî bûna û me her karê xwe bi kurdî kir. Li gorî me armanca me pêk hatiye.
Me heta îro du festîvalên kurtefîlman li dar xistine, me mazûvaniya çend konser û sazî û platformên wekî Chalak Events û Însiyatîfa Ronakê kiriye. Ji bilî wê me bi dehan komên şanoyê kir mêvan. Her wiha me atolyeyên şano, sînema, muzîk û hwd. li dar xistin.
Lê niha ez dixwazim eşkere bikim ku rewşa me ya aborî ne baş e.
Ji bo ku em vê pirsgirêka xwe çareser bikin di 17'ê Hazîranê de li The Mekana li Taksîmê bi tevlîbûn û piştgiriya hunermendên hêja Bajar, Dodan û Sîmir Rûdan saet di 20.00'an de emê konserek li dar bixin.
Bi vê konserê em hêvî dikin ku em xwe bigihînin saleke din û dîsa wekî berê di xizmeta hunera kurdî de bin.
Helbet mineta me li ser kesî tune ye û em gazinên xwe ji kesî nakin. Em dizanin ku rewşa kurdên ku bi hunerê re eleqedar in gelek dişibe hev. Daxwaza me tenê ew e ku; ev sazî neyê girtin û em karên xwe bidomînin. Helbet ev sazî ne tenê ya me ye. Deriyê vê saziyê her tim ji karên kurdî re vekirî ye. Kesên ku bixwazin xwedî li saziya Şa Performansê derkevin bila bizanibin ku Şa Performans cihê me hemûyan e. Li gel silavan."
Têbiniya Diyarnameyê: Yên bixwazin xwe bigihînin Şa Performansê, belkî alîkarî bikin, yan herin konserê, bilêtan bigirin, Şa Performans li Sehit Muhtar Mah. Nane Sok. No: 5, Taksîm, Beyoglu, Stenbol ye.