Diyarname
Serokê Baroya Amedê yê berê parêzer Tahîr Elçî roja 28'ê sermaweza 2015'an de li ber Minareya Çarling a Amedê hat kuştin. Hê jî kujerên wî nehatine eşkerekirin. Niha li ser navê wî weqfek tê vekirin û di vê weqfê de dê têkoşîna wî bê dayîn.
Weqif bi navê Weqfa Tahîr Elçî ya Mafên Mirovan hat amadekirin û sibê li Amedê dê bi awayekî fermî bi merasimek bê vekirin. Hat gotin ku di merasima vekirinê de mebûs, serokên baroyan, parêzerên mafên mirovan amade bin.
Serokatiya weqfê dê jina wî Turkan Elçî bi rê ve bibe. Di nav lijneya rêveberiyê de jî kesên wekî Orhan Kemal Cengiz, Erkan Şenses, Mursel Ekici, Cihan Ulsen, Mahsun Bati hene. Parêzer Neşet Girasun ku ligel Tahîr Elçî gelek kar kiribû dê peywira Cîgiriya Serokatiyê bigire ser milên xwe.
Armanca weqfê ew e li hemberî her cure şîdetê raweste, ji bo çareserkirina pirsgirêkên civakî û siyasî bi rêya aştiyane kedê bide. Di heman demê de dê têkoşîna Elçî ya mafên mirovan bidomîne.
Ji ser twittera weqfê re jî hat ragihandin ku 13'yê mehê li Amedê merasima vekirinê li dar dikeve.
**
Weqf vebû
Weqfa Tahir Elçî li Amedê bi merasimek hat vekirin. Di vekirinê de bal kişandin ser mafên mirovan û xebatên di vî warî de. Seroka Weqfê Turkan Elçî axaftina vekirina weqfê kir. (Ev not 13'yê mehê li nûçeyê hat zêdekirin)