KAWA ŞÊXÊ

Wekî em tevde dizanin ku di demên dawî de, gelek rengên hunera di nava kurdan de li pêşketin û di gelek waran de kurd bûne pispor û hunera xwe gîhandin heya bi astên cihanî jî.
Lê hîna gelek aliyê sist jî hene ku hewceyî xwedî lê derketinê ne û yek ji wana jî aliyê şano û şanogeriyê ye.
Gotinek heye dibêje“ heger miletek nirxê şanoyê rast nasbike, dê gelekî xwedî lê derkeve“ îcar nizanim ne kurda hîna ev nirx nasnekiriye, ne jî hîna derfet di destê wan de nîn in, lê bi çi halî be wekû ku dîroka miletan nîşan dide, şano dikare kulturek gelekî resen, baş û xweşik di nava miletan de ava bike.
Em ji girîngiya şano derbas bibin ji ber ku ev cara dehan in bi kêmanî ku ez li ser vê xalê dinîvisînim, ji bilê carên ku hevalan li ser nîvisandine.
Ez dixwazim îro li ser giringiya li darxistina konferansekî şano -ji bo vê hunerê - biaxivim.
Pêşî dixwazim bibêjim ku şêweyê konferansê ku ez behsa wî dikim çi ye, an jî wê bi çi awayî ev konferans li darkeve:
Ez dibînim ku konferansek ji hejmarek mezin ji şanogeran, lîstikvanan, nivîskarên şano, derhênerên şano û heya bi şagirtên ku vê hunerê nû fêr dibim û dixwînin; gerek werin cem hevûdin û bi pîlanek bi şêweyekî ku baş hatibe amade kirin, xebata xwe bikin. Sê rojan konferansa wana berdewam bike.
Di vê konferansê de û li gora nerîna min gerek gelek tişt bên kirin:
1 - Semînerên ku rewşa şanogeriya cihanê û ya kurdî nîşan bide.
2 - Semînerên ku li ser babetên taybet di şano de bên dayîn, mîna semînerek li ser ronahiyê, lîstikvaniyê, derhêneriyê, û her weha li ser gelek tiştên din ku bê wana şano li pêşnakeve.
3 - Pêşengehek ji pirtûkên şano çêbibe, pirtûk têde bên firotin û pêşneyaz kirin.
4 - Sînevizyona festîvalên şano yên ku heya niha li darketine, çêbibe da ku em rastiya vê hunerê di nava xwe de nas bikin.
5 - Pêşkêşkirina du, an jî sê şanoyan da ku konferans hinekî rengîn bibe û milet bikşîne.
6 - Pêşkêşkirina hinek dersên şano, da ku xwendevan teşwîq bibin û berê xwe bidin vî karî bi rengekî akademîk û profesyonel, weka mînak, hinek ders li ser termên şano an jî li ser pantomîm an jî li ser deng û hereketên çav dikarin bi rengekî hêsan û xweşik bên şîrove kirin di seetin nîşan dayî de di konferansê de.
7 - Pêşengeha fotografên şanoyên kurdî û yên cihanî, heger peyda bibin.
8 - Konferansek li ser roja 27’ê adarê,( roja şanogeriya cihanê) dîrok û girîngiya wê.
Kesên vexwendî gerek ji her perçeyên Kurdistanê bin û hinek mêvanên biyanî jî dikarin hazir bibin, ku di warekî ji warên şanogeriyê de mijûl bûbin û gelekî giring e jî ku zimanê vî konferansî kurdî be û tenê kurdî be.

Ev konferans dê ji bo çi girîng be?
Ev konferans dê çi bi xwe re bîne, dê çi li pêş bixe û dê çi bandorê li ser şaonegeran bike?
Di baweriya min de, ev hunera ku em dibêjin ku hatiye jibîrkirin, hîna hin kes ku jê hezdikin hene û her weha kes hene dixwazin ku vê hunerê bikin û wê li pêş bixin. Ji ber vê yekê jî û ji ber gelek sedemên din dê hatina wan şanogeran li ser navê pêşxistina xebata şano gelekî girîng be.
Çima dê hatina şanogeran cem hev girîng be?
Karê şano ne wek karê stranê ye, şano xebatek kolektîf e, kesek bi tena xwe gelek zehmetiyan dê bikşîne da ku karibe karekî şano derxîne ronahiyê, lê grûpek bi hev re dê karê wan hêsantir bibe, ez gelek caran di bernemeyên televizyonê de şanogeran dibînim ku gazinan dikin û dibêjin ku deqên şano yên kurdî di nava destê wan de tunene, yan jî ku lîstikvan tunene, lê piştre em nasdikin ku gelek pirtûk hebûn û haya wî ji wana nebû.
Carna jê û piştî ku em derdikevin ser dikê û em gelek zehmetiya dikşînin di hilbijartina lîstikvanan de em dibihîzin ku yekî nêzîkî me bi salan şano çêdike û em hev û din nasnakin.
Yanî hevûdin naskirina şanogeran dê karê wan li pêş bixe, dê bihêle ku şanoger zanebûnê bi hev biguhêzin dê bihêle ku tecrûba xwe bidin hevûdin û wisa dê her yek ji wana bibe dîrok ji yê din re.
Konferansa şano dê gavek dîrokî be di warê şanogeriya kurdî de, wek çawa ku şanoya ku di komara Mshabadê de hatibû pêşkêşkirin heya niha bûye bingeh û navtêdan û mînaka şaristaniya dê komarê, dê ev konferans jî bibe wekû destpêk ji bo ku şanoya kurdî timî vê rojê pîroz bike û dê bibe motîva herî mezin ji şanogeran re da ku êdî rajên erkê li ser milê xwe yê dîrokî di afirandina berhemên nû de, da ku em bi asta şanoya xwe gavekê ber bi asta şanogeriya cihanî de bavêjin.

Ji Azadiya Welat hatiye girtin (08/06/2010)