Diyarname

Heyeta BDP'ê ku ji Hevserokê BDP'ê Selahattin Demirtaş, hevserokê DTP'ê yê berê Ahmet Turk, mebûsa BDP'ê Emine Ayna û nûnerê BDP’yê yê DYA’yê, Nazmî Gur pêk tê hevdîtinên xwe yên li DYA'yê (Dewletên Yekbûyî yên Amerîkayê) didomînin. Heyetê bi Balyozê Tirkiyeyê yê Washingtonê Namık Tan re hevdîtinek pêk anî. Ahmet Turk 'otonomiya demokratîk' xwest.

Heyeta BDP'ê roja 3'yê gulanê bi Balyozê Tirkiyeyê yê Washingtonê Namık Tan re hevdîtineke pêk anîn. Heyetê bi Tan re li ser serdana xwe ya DYA'yê bi Tan re axivî.

Dûre 4'ê mehê heyetê konferanseke pêşkêşî saziya ramandar a DYA'yê Carnegie Endowment kir. Di konferansê de Demirtaş û Turk axivîn.

Demirtaş got ku projeya 'pêşîlîvekirina demokratîk' a AK Partî li ber sekeratê ye, ji ber bêpolîtîkayiya Ak Partî proje ber bi têkçûnê ve ye. Demirtaş li ser têkiliya bi PKK'ê re jî da zanîn ku "ne organîk, ne jî înorganîk, dîrekt an jî înderekt tu girêdanek wan bi PKK'ê re nîn e, PKK li Rojhilata Navîn realîteyeke mezin e. Di çareserkirina pirsgirêka kurd de PKK aktorek e, dema partî polîtîkayê saz bikin gere li ser vê jî bifikirin."

Demîrtaş xwest ku ji bo rû bi rû bûna paşerojê divê komîsyoneke bê sazkirin û bibîr xist ku li Tirkiyeyê 17 hezar kuştinên kiryar nediyar, 3 hezar winda, valakirin û şewitandina gundan ne tenê hiqûqî, divê ji aliyê ehlaqî û wijdanî ve jî li ser wan bê sekinîn.

Turk jî bal kişand li ser astengiya bendava hilbijartinê û got ku ger bendav dakeve sedî 5'an ewê ji sedî 10'an zêdetir dengan bi dest bixin.

Turk got ku ji avakirina Komarê re li ser kurdan siyaseta înkarê heye û di sê waran de wisa daxwaza wan anî ziman: "Vesazkirineke Zagona Bingehîn ku nasnameya kurd wekî dewlemendiya Tirkiyeyê qebûl bike", "Mafên çandî û di warê saziyan de bi awayekî azad bikaranîna kurdî", "Li herêmên ku kurd lê zêde ne demokratîk otonomî".

Li ser pirseke li ser Başûr jî Turk wisa got: "Em piştgirî didin xurtkirina têkiliyên bi rêveberiya Başûr re. Lê ger ev têkilî li hemberî kurdên Tirkiyeyê bê bikaranîn em dij derdikevin."

Heyet heta 8'ê mehê li DYA'yê wê hevdîtinên xwe bidomîne.