AMED
Koma Aştiyê ku ji zêdeyî 100 kesî pêk tê, di 29'emîn roja dorpêçkirina Sûrê de hat Amedê û li qada Şêx Seîd daxuyanî da. Li ser navê komê Lale Mansur, axivî û diyar kir ku yê esil ne mirin, jiyan e, êdî bes e. Mansur: "Em biratiya hezar salan nekin qurban. Sibê dê pir dereng be, hûn dizanin?" Rojnameger û nivîskar Oya Baydar jî bertekên xwe anî ziman û wiha got: "Bêyî ku hê zêdetir mirov bên kuştin û cenazeyên 7 rojin li kolanan tên rawestandin zêde rebin, li masê rûnên."
Koma Aştiyê ku di nav de rewşenbîr, nivîskar, hunermend û hiquqnas jî hene zêdeyî 100 kesî,ji bo geşedanên li Amedê û herêmê bişopînin hat Amedê. Koma Aştiyê li Parka Sumer derket pêşberî çapemeniyê. Dûre kom derbasî Qada Şêx Seîd bû û li vir daxuyanî da çapemeniyê. Kom di bin dorpêça polîsan de çû qadê û li vir daxuyanî dan. Gelek erebeyên zirxî û erebeyên tîmên taybet ên Ford Renger li ser kolanê rawestiyan. Koma ku piştgirî da Koma Aştiyê bê navber siloganên "Bijî berxwedana Surê" berzkir û pankartên "Em dê bi berxwedanê bi ser bikevin", "Ya esil jiyan e, bila çek rawestin, bila zilm raweste em aştiyê biaxivin" vekirin. Komê bê navber lîlandin û siloganên "Me di ber xwe da em dê bi ser bikevin" berz kir. Kom piştî hat qada Şêx Seîd bi kurdî û tirkî daxuyanî da. Li ser navê komê bi kurdî Hunermend Rojda û bi tirkî lîstikvan Lale Mansur daxuyanî xwend
Di daxuyaniyê de wisa hat gotin: "Li ser xwîn, mirin û hilweşandinê desthilatî nayê avakirin. Ji bo em dengê wijdanê hevpar ragihînin em hatin Amedê. Bila çek bêdeng bibin. Bila kuştin û mirin bi dawî bibe. Bila bi lezgînî li ber masê rûnin. Bila bi awayekî demokratîk rûnin û meseleyê çareser bikin. Ya esil ne kuştin jiyan e. Azadiya mirovan kêfxweşiya mirovan e. Êdî Bes e! Em zarokên xwe nekin qurban. Em biratiya xwe ya hezar salan nekin qurban. Sibê dê pir dereng be, hûn dizanin?"
Dûre nivîskar Oya Baydar dîtinên xwe anî ziman û xwest bi lezgînî şer bi dawî bibe û wiha got: "Dema şer hebe wate û qîmeta gotinê tune ye. Ji bo qîmeta gotinê hebe divê çek rawestin. Em rêya aştiyê vekin. Ji niha û pêde ji bo bi hezaran kes bên vir divê em têbikoşin."
Nivîskar Baskin Oran jî got ku kurdên li bajaran di bin topan de ne bi tenê ne û wiha got: "Em hatin bêjin em kesên li rojavayên Tirkiyeyê bi were ne. Hûn ne bi tenê ne. Qîmeta kuştinê tune. Li hemû cîhanê şer çêbû. Di encamê de mirov li hev rûniştin û bi riya diyalogê pirsgirêk çareser kirin Li ser masê pirsgirêk çareser kirin. Gelek mirov hatin kuştin. 7 rojin cenazeyên wan li kolanan in. Ji bo cenazeyên li kolanan zêde nebin li masê rûnên."
Rakel Dink jî wisa got: "Axa dayik ji xwînê têr nabe, em hatin ku bibêjin bes e, em bangî her alî dikin: Ew qas êş bes e."
Piştî daxuyaniyê kom derbasî Walîtiya Amedê bû. Komek jî çû Kolana Gazî ya piştî 29 rojan qedexe lê bi dawî bû, bi welatî û esnafan re hevdîtin kir. Kom dûre çû serdena Şaredariya Bajarê Mezin a Amedê û Baroya Amedê.