Diyarname

Nivîskarê kurd Jîr Dilovan ku di hefteya derbasbûyî de du sal li ser nexweşketina wî re derbas bûn, gav bi gav ber bi başiyê ve diçe. Keça Jîr Dilovan, Nêrgiz ku ji nêz ve bi tendûristiya bavê xwe ve eleqedar dibe, li ser rewşa dawî ya wî agahdarî dan me.

Nêrgiz bi bîr xist ku xetimandina rayekî mêjiyê çepê yê Jîr Dilovan ya ji nişke ve bûbû sedem ku ew zêdeyî sê mehan li du nexweşxaneyên cuda tedawiyên cure bibîne. Wekî encamên xetimandina rayê mêjî ya ji nişke ve jî, di ragihandina di navbera pergala mêjî û axaftinê de texrîbat çêbûbûn û her wiha milê wî yê rastê jî felc bûbû.

Keça Jîr Dilovan, Nêrgiz rewşa bavê xwe ya niha wisa anî ziman: “Tedawiya wî êdî li malê ye. Heta niha textor dihatin malê, lê êdî em wî dibin civanên wî yên bi textoran re. Tedawiyên wî ji ergoterapî, logopedî û jîmlastîkê pêk tên. Moralê wî baş e. Ez bawer dikim ku wê di demeke kurt de baştir bibe. Di destpêkê de ji ber felçê jî lê xist, nedikarî bimeşe. Lê bi riya tedawiyê niha felç tenê li ser destê wî yê rastê maye û bi kopalê, bêyî pirsgirêk digere.”

Nêrgiz dibêje ku hafiza wî wekî berê ye û pirsgirêka hafizaya wî nîn e. Lê belê ji ber pirsgirêka ragihandinê di navbera pêrgala mêjî û zimên de heye, tişta dixwaze bibêje, heta digihe li ser zimên, ji bîr dike. Ew li ser vê yekê vê mînakê dide: “Dema dixwaze bibêje ‘Mêrdîn’, heta kîte ‘Mêr…’ dibêje, kîteya ‘dînî ji bîr dike. Lê ev du sal in em li cem in û ji wê yekê hemû tiştî jê fêm dikin. Ji xwe gelek caran bi riya îşaretan jî daxwazên xwe radigihîne.”

Keça nivîskar Jîr Dilovan li ser jiyana rojane ya wî jî wisa dibêje: “Pirtûkan dema çend caran bixwîne fêm dike, lê belê zû ji bîr dike. Gelek caran ji dosyayan nivîsên xwe yên kevin diderîne û ji xwe re dixwîne. Li nûçeyan temaşe dike û dikeve înternetê jî. Gelek caran ji me dixwaze ku em nivîsan jê re bixwînin.” Nêrgiz li ser berhemên bavê xwe yên ku nehatine çapkirin jî wisa diaxive: “Hem berhemên wî yên qediyayî û hem jî yên neqediyayî hene. Me wekî malbatê dest neda tiştên wî, ji ber em dizanin ku ew bi xwe wê baş bibe. Em naxwazin tiştên wî tevlihev bikin û ji xwe ew bi xwe jî dibêje ew ê wan çêbike.”

Keça Jîr Dilovan Nêrgiz dide ragihandin ku li gor dîtinên textoran îhtîmal heye ku di nava salekî hem pirsgirêka wî ya axaftinê ji holê rabe û hem jî felça destê wî baş bibe. Ew di dawiyê de dibêje ku dema hevalên wî têne cem, moralekî mezin jê re çêdibe û bi van agahdariyan gotina xwe diqedîne: “ Bavê min bi moral û bi îrade ye. Ji bo başbûna wî çi ji destan tê, em dikin. Bila nas û dostên wî diayên xwe jê kêm nekin.”

Em wekî Diyarname careke din hêviya başbûna nivîskar Jîr Dilovan dikin û hêvî dikin ku di demeke nêz de dê vegere nav me.